Senattyń jalpy otyrysynda «Qazaqstan Respýblikasynyń Úkimeti men Kipr Respýblikasynyń Úkimeti arasyndaǵy tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsiiany jáne oǵan Hattamany ratifikatsiialaý týraly» Zańy qabyldandy, dep habarlaidy "Ult aqparat".
Konventsiia Ekonomikalyq yntymaqtastyq jáne damý uiymynyń modeldik konventsiiasynyń negizinde jasalǵan. Osyndai halyqaralyq sharttar sheteldik investorlarǵa kepildik berip, salyq salý quqyǵyn eki memleket arasynda ádiletti bólisýge múmkindik beredi.
Konventsiia kelesi maqsattardy kózdeidi: birinshiden, aldaǵy ýaqytta salyqtyń barlyq túrleri boiynsha aqparat almasýdy qalyptastyryp, salyq qyzmetteri arasyndaǵy yntymaqtastyqty nyǵaitý; ekinshiden, rezidenttikti dáleldeitin, eki memlekette birdei qoldanylatyn tártipti belgileý; úshinshiden, dividendter, paiyzdar, roialti siiaqty passivti tabystarǵa shekti stavkalardy bekitý; tórtinshiden, eki eldiń quzyretti organdardyń arasyndaǵy salyqtyq daýlardy sheshý úshin quqyqtyq negiz qalyptastyrý.
«Kiprmen ózara saýda-sattyq týraly derekterdi qysqasha aityp ótkim keledi. Eki el arasyndaǵy taýar ainalymy sońǵy 10 jylda 440 mln dollardy qurady. 2016 jyly jalpy saýda ainalymy 7 mln dollardy ǵana quraǵan bolatyn. 2019 jyldyń 9 aiy boiynsha Qazaqstan jáne Kipr arasyndaǵy ózara saýdanyń kólemi edáýir ulǵaiyp, 30 mln dollardy qurady. Onyń ishinde eksport – 28 mln dollar, import – 2 mln dollar. Taýar ainalymnyń kóbeiýi Qazaqstannyń munai ónimderin eksportqa kóptep shyǵarýyna bailanysty. Qazaqstannyń Kiprge eksportynyń negizinde kómir, munai ónimderi, aliýminii jáne azyq ónimderi qamtylǵan. Import qurylymynda, kóbinese farmatsevtik jáne tamaq ónimderi, parfiýmerlyq, kosmetikalyq jáne tazalyqpen bailanysty zattar», - dedi QR Úkimet basshysynyń birinshi orynbasary – Qarjy ministri Álihan Smaiylov.
