Kórneki foto: NUR.KZ/Petr Karandashov
Ǵylym jáne joǵary bilim ministri Saiasat Nurbek L.N. Gýmilev atyndaǵy Eýraziia ulttyq ýniversitetinde jańa oqý jylynda elimizdegi JOO-larda oqý aqysy kóterile me degen saýalǵa jaýap berdi, dep jazady KAZ.NUR.KZ.
Saiasat Nurbektiń málimdeýinshe, joǵary oqý oryndaryndaǵy oqý aqysyna birneshe faktor áser etedi.
"Aqyly bilim baǵasy - kópti tolǵandyratyn másele. Birneshe joǵary oqý orny, atap aitqanda batys óńirdegiler baǵany kótergen. Birinshiden, bul - jekemenshik ýniversitetter. Ekinshiden, birneshe jyl buryn oqý aqysyn kóterýge moratorii jariialanǵan bolatyn.
Endi ol kúshin joiǵan soń birqatar ýniversitet oqý aqysyn kótere bastady. Osy rette biz qazirgi áleýmettik-ekonomikalyq ahýaldy nazarǵa alamyz", - dedi ol.
Sonymen qatar ministr memlekettik jáne ulttyq ýniversitetterde oqý aqysy kóterilmeidi dep sendirdi.
"Memlekettik jáne ulttyq ýniversitetterdegi oqý aqysy ótken oqý jylynyń deńgeiinde qalady. Biz bul máseleni baqylaýda ustaimyz", - dedi Ǵylym jáne joǵary bilim ministri.
