Olimpiada formasynyń sońǵy dizainy osy jazda Qazaqstan ulttyq olimpiada komitetiniń resmi tanystyrylymynda kórsetiledi, – dep habarlaidy Olympic.kz
Tokio Olimpiadasyna qatysatyn ulttyq quramanyń kiim úlgisiniń dizainyna jariialanǵan ashyq konkýrstyń jeńimpazdary anyqtaldy.
Konkýrsqa 19 qatysýshy óz jumystaryn joldady. Olardyń barlyǵy ulttyq olimpiada komitetiniń saitynda jariialandy.
Jeńimpazdardy Qazaqstan UOK sport direktsiiasy men ulttyq paralimpiada komiteti ókilderinen, Qazaqstan UOK sportshylar komissiiasynyń múshelerinen quralǵan arnaiy komissiia anyqtady.
Komissiianyń qorytyndy otyrysy boiynsha "KazSPO –N" JShS Zibroo Active Sportswear "sporttyq forma" jáne "Marino Madi" JShQ "paradtyq forma" jeńimpaz atandy.
"Qatysýshylardyń barlyǵy – qazaqstandyq dizainerler. Biz úshin bul óte qýanyshty jaǵdai. Sebebi, olimpiada formasyn daiyndaýda otandyq kásipkerlerdiń ónimderin qoldaý bizdiń basty maqsatymyz bolatyn", - dedi ulttyq olimpiada komitetiniń resmi ókili Jiger Ázbergenov.
Endi baiqaý jeńimpazdary arasynda Olimpiada formasynyń dizainy men tehnologiialyq talaptarynyń túpkilikti tujyrymdamasy boiynsha odan ári jumys júrgiziledi.
Paradtyq jáne sporttyq kiim úlgisin bekitý úshin Qazaqstannyń Olimpiada qurama komandasynyń ókilderinen arnaiy komissiia qurylady.
Sońǵy sheshimdi Tokioda ótetin jazǵy Olimpiadaǵa qatysatyn sportshylardyń ózderi qabyldaidy.
Biyl jazda Japoniianyń astanasy Tokioda XXXII jazǵy Olimpiada oiyndary ótedi.
Dúbirli doda 24 shildede bastalyp, 9 tamyzǵa deiin jalǵasady.
