Foto: otokar.com.tr
Qorǵanys ministrligi túrkiialyq Otokar kompaniiasymen 2 trillion teńgege brontransporterler satyp alý týraly kelisim jasalǵany týraly aqparatqa qatysty pikir bildirdi, - dep habarlaidy "Ult aqparat".
"Qazaqstan Respýblikasy Qorǵanys ministrligi men túriktiń "Otokar" kompaniiasy arasynda 2 trillion teńgege jýyq somaǵa brondy tehnikany satyp alýǵa kelisim jasalǵany týraly áleýmettik jelide tarap jatqan aqparat shyndyqqa sáikes kelmeidi.
Búginde túrik tarapymen brondy tehnikany jetkizý boiynsha eshqandai kelisim joq. "Otokar" kompaniiasy brondy tehnika óndirýshileriniń biri ǵana bolyp tabylady, onyń úlgileri qyzmetke qabyldaý erejelerinde bekitilgen rásimge sáikes jalpy negizde qaralady. Bul týraly Qorǵanys ministrligi buǵan deiin de habarlaǵan bolatyn", - delingen málimdemede.
Bul rette tehnikanyń basqa da sheteldik úlgileri qarastyrylady.
"Qazirgi ýaqytta atalǵan kompaniianyń 8h8 brondy tehnikasynyń úlgisi otandyq brondy tehnikanyń úlgisimen qatar tájiribelik synaqtardan ótip jatyr. Olardyń nátijeleri boiynsha tehnikalyq talaptarǵa sai tehnikanyń úlgisi aiqyndalady.
Esterińizge sala keteiik, Qorǵanys ministrligi óz quzyreti sheńberinde memlekettiń qorǵanys qabiletine jaýap beredi jáne qarý-jaraq pen áskeri tehnikanyń ártúrli úlgilerin qajet etedi. Bul rette qorǵanys vedomstvosy úshin úlgilerdi tańdaý kezinde otandyq jáne halyqaralyq sarapshylar moiyndaǵan ónimniń sapasy basymdyqqa ie. Sondyqtan áleýmettik jelilerde taralatyn ártúrli jalǵan aqparattarǵa súienbei, tek tekserilgen, resmi aqparat kózderine senýdi suraimyz" - delingen habarlamada.
