Sinhrondy júzýden Qazaqstan komandasynyń músheleri Aleksandra jáne Ekaterina Nemichter 2020 jylǵy Tokio Olimpiadasyna qatysý normativin oryndady, dep habarlaidy "Ult aqparat".
QR Ulttyq Olimpiadalyq komitetinen málim etkendei, apaly-sińlili Nemichter Kvandjýda ótken 2019 jylǵy Álem chempionatynyń qorytyndysy boiynsha litsenziiaǵa ie boldy.
Aita keteiik, dýetterdi Olimpiada oiyndaryna irikteý birneshe tásilmen júzege asyrylady. Alǵashqy 10 komandaǵa Álem chempionatynyń nátijesi boiynsha Tokioǵa joldama avtomatty túrde beriledi. Olardyń qatarynda oiyndy qabyldaityn memleket Japoniia, Resei, Mysyr, Avstraliia, Ýkraina, Qytai, Kanada eliniń ókilderi bar. Olimpiadanyń bes joldamasy ár qurlyqta joǵary orynda turǵan komandalarǵa reiting boiynsha úlestiriledi (Japoniia esepke alynbaidy).
Litsenziiany Aziia qurlyǵynan - Qazaqstan, Afrikadan - Ońtústik Afrika Respýblikasy, Okeaniia aimaǵynan - Jańa Zelandiia ielendi. Panamerika oiyndarynyń qorytyndysy boiynsha joldama Amerika nemese Meksikanyń birine buiyrady. Al Eýropadaǵy ókil keiin anyqtalmaq.
Olimpiada oiyndarynyń qalǵan jeti qatysýshysy irikteý týrnirinde reiting boiynsha anyqtalady. Halyqaralyq Olimpiada komiteti sinhrondy júzýden dýetterge arnap 22 kvota bólgen.
Osylaisha, búginge deiin Qazaqstan quramasy 12 litsenziiaǵa ie boldy. Buǵan deiin Rishat Haibýllin (sporttyq quzǵa órmeleý), Dmitrii Balandin (100,200 metrge brass ádisimen júzý), Olga Rypakova, Georgii Sheiko (jeńil atletika), Evgenii Gidich (velosport), klassikalyq túrde sadaq atýdan Qazaqstan erler komandasy (Denis Gankin, Ilfa Abdýllin, Sanjar Musaev) jáne Vitalii Hýdiakov (ashyq sýda júzý) Olimpiadaǵa qatysý normativin oryndaǵan bolatyn.
