«Qazaqstan» teleradiokorporatsiiasynda birqatar kadrlyq ózgerister oryn aldy, dep habarlaidy "Ult aqparat" teleradiokorporatsiianyń baspasóz qyzmetine silteme jasap.
Maqpal Jumabai «Balapan» arnasynyń direktory qyzmetine keldi. Al, osy arnany basqaryp kelgen Janar Shámel «Qazaqstan» RTRK AQ tóraǵasynyń keńesshisi qyzmetine taǵaiyndaldy.
Ázimhan Aýsatov «Qazaq radiolary» JShS Bas direktorynyń orynbasary qyzmetine, «Qazaq radiosynyń» direktory laýazymyna Názira Berdaly, «Shalqar» radiosynyń direktory bolyp Qalqaman Sarin taǵaiyndaldy.
Janar Shámel «Qazaqstan» Ulttyq telearnasyndaǵy tańǵy baǵdarlamalardyń júrgizýshi qyzmetinen bastaǵan. Uzaq jyldar «Tańsholpan» habarynyń tikelei efirin júrgizip, shef - redaktor, prodiýser qyzmetterin atqardy. 2010 jyly Elbasynyń bastamasymen ashylǵan tuńǵysh «Balapan» telearnacynyń negizin qalaýshylardyń biri, alǵashqy direktory boldy. Ana tilimen qosa aǵylshyn, ýrdý, hindi tilderin meńgergen.
Maqpal Jumabai alǵashqy eńbek jolyn respýblikalyq «Ana tili» ult gazetiniń tilshisi bolyp bastaǵan. Ár jyldary «Qazaqstan» telearnasy tańǵy baǵdarlamalar birlestiginiń redaktory, shef-redaktory, sondai-aq, «Balapan» arnasynyń shef-redaktory, prodiýseri qyzmetterin atqarǵan.
Memlekettik «Daryn» Jastar syilyǵynyń, QR Prezident qory grantynyń iegeri.
Ázimhan Aýsatov ár jyldary «Qazaq radiosynda» redaktor, aqparatty-saraptamalyq jáne tańǵy baǵdarlamalar redaktsiiasy jetekshisiniń orynbasary, aimaqtar redaktsiiasynyń jetekshisi, shef redaktory qyzmetterin atqaryp keldi.
Nazira Berdaly eńbek jolyn «Qazaqstan» telearnasynda tańǵy baǵdarlamalardyń redaktory bolyp bastaǵan. Ár jyldary televiziia salasynda júrgizýshisi, shyǵarmashylyq toptyń jetekshisi, bas redaktordyń orynbasary bolyp qyzmet etti. QR Prezidentiniń ádebiet salasyndaǵy syilyǵynyń iegeri.
Qalqaman Sarin 2013 jyly «Astana» telearnasynda «Kesh emes» saiasi-áleýmettik tok-shoýynyń jáne 2016 jyly «Qazaqstan» arnasynda «Oi-tolǵaý» baǵdarlamasynyń júrgizýshisi boldy. Memlekettik «Daryn» Jastar syilyǵynyń, QR Prezident qory grantynyń iegeri.
