Qazaqstanda Táýelsizdiktiń 30 jyldyǵy qurmetine merekelik medal tapsyrylady. Aqparat jáne qoǵamdyq damý ministrligi merekelik medal týraly prezident jarlyǵynyń jobasyn daiyndady. Qujat "Ashyq NQA"portalynda jariialanǵan.
"Merekelik medalmen Qazaqstan Respýblikasy memlekettiliginiń qalyptasýyna, egemendiginiń nyǵaiýy men áleýmettik-ekonomikalyq damýyna eleýli úles qosqan Qazaqstan azamattary jáne shetel azamattary nagradtalady", - delingen qujatta.
Merekelik medaldi Qazaqstan prezidenti tapsyrady. Nagradtalǵan adamǵa medalmen qosa belgilengen úlgidegi kýálik tabys etiledi.
Medal saltanatty túrde marapattalatyn adamnyń jeke ózine tapsyrylady.
Merekelik medal sol jaq omyraýǵa taǵylady. Qazaqstan Respýblikasynyń memlekettik nagradalary bolǵan jaǵdaida olardan keiin ornalasady.
Medalda ne beinelengen?
"Qazaqstan Respýblikasynyń Táýelsizdigine 30 jyl" merekelik medali durys sheńber formasynda bolady, diametri – 34 mm.
Bet jaǵynda (aversinde) "QAZAQSTAN TÁÝELSIZDIGINE 30 JYL" degen jazý ornalasqan. Tómengi bóliginde ulttyq oiý-órnek beinelengen.
Merekelik medaldiń syrtqy betiniń (reversinde) ortańǵy bóliginde tórt jolmen oryndalǵan "QAZAQSTAN RESPÝBLIKASYNYŃ TÁÝELSIZDIGINE 30 JYL" degen jazý beinelengen. Jazýdyń tómengi jáne joǵarǵy jaǵynda ulttyq oiý-órnek elementteri ornalasqan.
Medaldaǵy beineler men jazýlardyń bári de bederli, altyn tústes. Avers pen revers beti kúńgirt.
Merekelik medal sary tústi metaldan (jezden) daiyndalady.
