Qazaqstan sýy az tabiǵi kezeńge kirdi. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy "Ult aqparat".
«Ózen basseinderi boiynsha júrgizilgen taldaýǵa sáikes Qazaqstan sýy az tabiǵi kezeńge kirdi jáne 2019 jyly jalpy 83 shaqyrym tekshe metrge teń boldy. Aita ketetin jait, sońǵy jyldary bul kórsetkish 90-100 shaqyrym tekshe metr deńgeiinde boldy. Osyǵan bailanysty, sýarmaly jerler boiynsha jaǵdai qiyndady. Ásirese eldiń ońtústik oblystarynda qatty sezildi. Óitkeni eldegi sýarmaly alqaptardyń 90 paiyzy osy jaqtarda ornalasqan. Al respýblika boiynsha qoldanysqa alynatyn sýdyń 97 paiyzy ońtústik óńirge tiesili», - dedi ol Senat tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.
Onyń dereginshe, vegetatsiialyq kezeńniń qorytyndysy boiynsha Almaty oblysynda ótken jyldarmen salystyrǵanda qar jamylǵysy 35 paiyz az boldy. Jambyl oblysynda sýlylyq ortasha kóp jyldyq derekterden 15-20 paiyz tómen tirkeldi.
«Osyndai problemalarmen biz Túrkistan jáne Qyzylorda oblystarynda tap boldyq. Alaida, sý sharýashylyǵynyń qolaisyz jaǵdaiyna qaramastan, Memleket basshysy bul máselelerdi shekaralas elderdegi áriptesterimen kezdesý kezinde kótergendikten, sý berý jospary 90-100 paiyzǵa oryndaldy. Sonymen qatar, kollektorlyq-drenajdyq sýlardy qaita paidalaný praktikasy júrgizildi», - dedi ministr.
