Syrtqy ister ministrligi jáne Bas redaktorlar klýby elimizdiń táýelsizdiginiń 30-jyldyǵyna arnalǵan «Qazaqstan sheteldik BAQ kózimen» VI halyqaralyq baiqaýynyń bes jeńimpazyn anyqtady, dep habarlaidy SIM saity.
Uiymdastyrýshy komitettiń qaraýyna óz materialdaryn sońǵy on eki aida jariialaǵan 36 memlekettegi avtordan 60 usynys kelip tústi. Baiqaýǵa qatysýshylardyń jumystary ekonomika, saiasat, halyqaralyq qatynastar, mádeniet, týrizm, densaýlyq saqtaý, sport, qarýsyzdaný, jańǵyrmaly energiia, Abai Qunanbaiuly jáne ál-Farabi muralary siiaqty Qazaqstanǵa qatysty keń aýqymdy taqyryptarǵa arnaldy. Materialar gazetterde, jýrnaldarda, onlain BAQ-tarda, telearnalarda, podkasttar men ózge de tanymal blog-platformalarda jariialanǵan. Jalpy alǵanda, uiymdastyrýshylardyń pikirinshe, baiqaýǵa sheteldik jýrnalisterdiń belsendi qatysýy sheteldik BAQ-tyń Qazaqstanǵa degen qyzyǵýshylyǵynyń joǵary ekendigin aiǵaqtaidy.
Kelip túsken usynystardy qarastyrý nátijesinde ádilqazylar alqasy kelesi jeńimpazdardy anyqtady. TMD jáne Baltyq elderinen úmitkerlerdiń arasyndaǵy úzdik material retinde jýrnalist Nikolai Jýkovtyń (Litva) «Kauno Diena» gazetinde jariialanǵan «Qazaqstan bir jyl ishinde biliktiń evoliýtsiialyq sabaqtastyǵynyń ózindik úlgisin kórsetti» atty maqalasy tańdaldy. Tsolmon Baterdeneniń (Monǵoliia) «MNB Mongolian National Broadcaster» telearnasynda jaryq kórgen «37 shaqyrymdaǵy 37 jyldyq jospary bar kórshi» atty beinematerialy men maqalasy Aziia jáne Tynyq muhit aimaǵynyń elderinen kelip túsken ótinimderdiń ishinde úzdik dep tanyldy.
Pákistandyq avtor Mehmýd Ýl Hassan Hannyń «Islamabad Post» jáne «DNA News» basylymdarynda jaryq kórgen Qazaqstandaǵy saiasi jáne ekonomikalyq reformalardyń ózekti máselelerine jáne Abai Qunanbaiulynyń rýhani murasyna arnalǵan maqalalary Taiaý Shyǵys jáne Afrika óńirinen kelip túsken úzdik material bolyp tanyldy. Ońtústik jáne Soltústik Amerikadan kelip túsken usynystar arasynan úzdik material retinde «Kanadanyń birikken qaýymdastyqtary» ÚEU men telejýrnalist Inga Kernei-Kelner birlese daiyndaǵan «Qazaqstan kanadalyqtar kózimen» atty beinematerial irikteldi.
Buǵan deiin atalyp ótkendei, baiqaý jeńimpazdary Qazaqstanǵa saparmen kelý múmkindigine ie bolady. Sapar aiasynda olar Nur-Sultan, Almaty jáne Túrkistan qalalaryna, «Býrabai» demalys aimaǵyna baryp, elimizdiń tabiǵi jáne mádeni nysandaryn aralap, belgili jýrnalister, diplomattar jáne qoǵam qairatkerlerimen kezdese alady. Baiqaý uiymdastyrýshylary «Qazaqstan sheteldik BAQ kózimen» VI halyqaralyq baiqaýyna qatysýshylarǵa alǵys bildire otyryp, olarǵa jańa shyǵarmashylyq tabys pen jetistik tileidi.
