Keshe birqatar BAQ-ta jaqyn shetelden Qazaqstanǵa avtokólik ákelýdi shekteý týraly jańalyq jariialandy. Ol Úkimet basshysynyń depýtattyq saýalǵa bergen jaýabynan alynǵan. Osyǵan bailanysty QR Premer-Ministriniń baspasóz qyzmeti túsinikteme berdi, dep habarlaidy "Ult aqparat".
"Búgingi tańda sheteldik kólik quraldaryn zańnamany buza otyryp elge ákelý jaǵdailary jiilep ketti. Atap aitqanda, urlanǵan nemese kepilge qoiylǵan, jalǵan nómir taǵylǵan jáne t.b. avtomobilderdi paidalaný faktileri anyqtalyp jatyr.
Máselen, ótken jyly ǵana basqa elderdiń quqyq qorǵaý organdarymen salystyrý qorytyndysy boiynsha Qazaqstanǵa ákelingen 35 myńnan astam avtomobildiń bank tarapynan jáne zań boiynsha shekteýleri bolǵany anyqtaldy. Sonymen qatar 600-den astam kólik elge ákelý kezinde EAEO-ǵa múshe elderdiń quqyq qorǵaý organdarynyń izdestirýinde bolyp shyqty.
Osyǵan bailanysty Qazaqstanǵa «problemalyq» avtokóliktiń ákelinýin aldyn alý jáne jalpy ákimshilendirýdi jaqsartý úshin Kólik quraldaryn ákelý erejeleri (ýaqytsha erejelerdi qosa alǵanda) ázirlený ústinde. Onda mundai avtomobilder boiynsha baqylaýdy kúsheitý tetikteri, tipti olardy elge ákelýdi shekteýge deiin kózdeletin bolady" - delingen habarlamada.
Bul rette atalǵan sharalar Qazaqstan Respýblikasynyń aýmaǵyna zańnamany buzbai ákelingen jáne paidalanylatyn shet memleketterde tirkelgen avtomobilderge qatysty qoldanylmaidy.
