QR Saýda jáne integratsiia ministri Baqyt Sultanov qazaqstandyq saýda-ekonomikalyq missiianyń Aýǵanstanǵa barǵan delegatsiiasyn basqardy, dep habarlaidy "Ult aqparat" atalǵan ministrliktiń baspasóz qyzmetine silteme jasap.
Qazaqstannan barǵan bir top delegatsiianyń quramynda saýda jáne integratsiia ministrligi qyzmetkerleri, eksportty ilgeriletý jónindegi operatorlar, QazTrade kompaniiasy jáne birqatar otandyq eksporttaýshy kompaniianyń ókilderi bar.
Sapar barysynda ministr Aýǵanstannyń premer-ministriniń orynbasary Abdýlla Salam Hanafimen, syrtqy ister ministri Amir Han Mýttaki, sondai-aq atalǵan eldiń saýda jáne ónerkásip ministri M.A. Nýriddin Azizimen kelissózder ótkizdi.
Baqyt Sultanov óz kezeginde aýǵan ákimshiliginiń ókilderine Qazaqstan BUU-nyń Aýǵanstandaǵy gýmanitarlyq daǵdarysty eńserý jónindegi kúsh-jigerine tolyq qoldaý kórsetip, belsendi qatysyp otyrǵanyn jetkizdi. Dúniejúzilik azyq-túlik baǵdarlamasy 20 myń tonna qazaqstandyq undy satyp aldy.
«Bizdiń elimiz, kóptegen halyqaralyq áriptester siiaqty, aýǵanaralyq qaqtyǵystyń belsendi kezeńi aiaqtaldy jáne eldi janjaldan keiingi kezeńde qalpyna keltirý ýaqyty keldi dep úmittenemiz», - dedi Sultanov.
Sondai-aq, qazaqstandyq delegatsiia ókilderi eki jaqty saýdany taýarlar tizbesin keńeitý esebinen de saqtaýǵa jáne ósirýge múddeli ekenin aitty.
Aita ketsek, Aýǵanstanǵa un men astyqty negizgi jetkizýshi bizdiń el. Iaǵni qazaqstandyq un eksportynyń jartysynan astamy jáne astyq eksportynyń 10% -dan astamy tek aýǵan naryǵyna jóneltiledi.
Ministrlik usynǵan málemette aitylǵandai, ekijaqty kelissóz barysynda taýar ainalymy nomenklatýrasyn keńeitý múmkindigine nazar aýdardy. Máselen, Aýǵanstannyń eksporttyq áleýetinde $360 mln somasynda 45 taýar túri bar. Atap aitqanda tamaq, munai-himiia, himiia, metallýrgiia, jeńil, mashina jasaý, aǵash óńdeý jáne taǵy basqa.
«Atalǵan taýarlardy saýda ainalymyna qosý eki el úshin de tiimdi bolady jáne ol ekijaqty saýda ainalymynyń artýyna yqpal etetini aityldy. Sonymen qatar, qazaqstandyq delegatsiia ókilderi Aýǵanstannan jemister men kókónisterdi satyp alýǵa daiyn ekendikterin jetkizdi. Jáne otandyq saýdagerler eki el arasyndaǵy saýda teńgerimin teńestirý qajettigine nazar aýdardy. Qazaqstan quratyn transshekaralyq yntymaqtastyq ortalyqtary, onyń ishinde «Ortalyq Aziia» halyqaralyq ónerkásiptik kooperatsiia ortalyǵy aýmaǵyndaǵy qazaqstandyq jáne Aýǵan biznesiniń ónerkásiptik kooperatsiiasy quraldardyń biri bola alady», - delingen habarlamada.
Odan bólek, sapar barysynda Baqyt Sultanov Qazaqstan-Aýǵan biznes-forýmyna qatysty. Atalǵan sharada ministrmen birge azyq-túlik, jihaz jáne toqyma ónimderin óndirýshi 16 otandyq ónerkásip ókilderi de boldy.
V2V kezdesýler men biznes-forýmnyń qorytyndysy boiynsha Aýǵanstanǵa un, makaron jáne basqa da ónimderdi jetkizý boiynsha memorandýmǵa qol qoiyldy.
