«Qazaqstan» RTRK» AQ Basqarma tóraǵasy Erlan Qarin Indoneziiada ótip jatqan Aziada oiyndarynyń «Qazsport» telearnasynan kórsetilmeýine bailanysty túsinik berdi. Bul týraly ol áleýmettik jelidegi paraqshasynda jazdy.
«Qazsport» telearnasy, jalpy «Qazaqstan» korporatsiiasy múmkindiginshe birqatar aýqymdy sporttyq sharalardy kórsetý quqyǵyn alýǵa barynsha atsalysyp keledi. Qazirgi kezde Indoneziiada ótip jatqan Aziada oiyndaryn kórsetý josparymyzda bolǵan, tipti qajetti qarajat ta biýdjetimizden qarastyrylyp qoiǵan edi. Biraq, osy joly Aziadanyń litsenziialyq quqyǵyn satyp alý áldeqaida joǵary bolǵandyqtan, transliatsiialaýdan bas tartýǵa májbúr boldyq», - deidi ol.
Basqarma tóraǵasynyń aitýynsha, telearna menedjerleri Aziada oiyndarynyń quqyǵyn satyp alý jóninde 2017 jyldyń jeltoqsan aiynan bastap osy kezge deiin kelissózder júrgizgen. Alaida, joǵaryda aitqandai, osy jylǵy Aziada oiynynyń litsenziiasy Jazǵy Olimpiada oiyndary men taǵy da basqa álemdik deńgeidegi sporttyq sharalardyń baǵasyna qaraǵanda birneshe ese joǵary bolǵan.
«Biz óz tarapymyzdan Halyqaralyq sporttyq uiymdardy bul jaiynda eskerttik. Biraq, Aziada oiyndarynyń quqyǵy xalyqaralyq jekemenshik kompaniiada bolǵandyqtan, Halyqaralyq Olimpiada komiteti de, Azialyq keńes te aralasýǵa quqyǵy joq. Aziada oiyndarynyń kórsetiliminen tek biz ǵana emes, keibir kórshi memleketterdiń de ulttyq telearnalary bas tartýǵa májbúr boldy. Jáne de litsenziia baǵasy, ár eldiń ekonomikasy men telenaryqtyń damý deńgeiine bailanysty ár túrli. Sondyqtan, biz óz tarapymyzdan barlyq qazaqstandyqtar men telekórermenderimizden osy jaǵdai úshin keshirim suraimyz», - deidi Erlan Qarin myrza.
Degenmen «Qazaqstan» RTRK» sport alamanynan arnaiy habarlar daiyndap, jankúierler úshin mańyzdy aqparattar taratýǵa atsalysatynyn aitady.
«Múmkindigimizshe Aziada oiyndarynyń jańalyqtaryn taratý úshin «Qazsport» telearnasynan arnaiy túsirilim toby Djakartaǵa jibergen bolatynbyz. «Qazsport» jáne «Qazaqstan» telearnalarynda arnaiy jańalyqtar keńinen berilýde. Sonymen qatar, «Qazsport» telearnasynda ekskliýzivti materialdarmen Aziada kúndelikteri shyǵyp jatyr. «Qazaqstan» teleradiokorporatsiiasy ári qarai mańyzdy sporttyq kórsetilimdermen qamtamasyz etý jumystaryn jalǵastyrady», - deidi Basqarma tóraǵasy.
