Qazaqstan "Rosatommen" atom elektr stantsiiasynyń qurylysy jóninde kelissóz júrgizip jatyr. Bul týraly Strategiialyq josparlaý jáne reformalar agenttiginiń tóraǵasy, "Astana" Halyqaralyq qarjy ortalyǵynyń basqarýshysy Qairat Kelimbetov málimdedi, dep habarlaidy Sputnik.
"Bizge kún jáne jel energetikasyna investitsiia tartý qajet, alaida olar kómirdi tolyq almastyrmaidy. Bir jerde gaz kerek, sol úshin biz "Gazprommen" jumys istep jatyrmyz, biraq Qazaqstanǵa atom stantsiiasyn salýǵa týra keletin shyǵar. "Rosatommen" de kelissóz júrgizip jatyrmyz", - dedi Kelimbetov "Kommersant" basylymyna bergen suhbatynda.
Onyń aitýynsha, Qazaqstan 2060 jylǵa qarai kómirtek turǵysynan beitarap memleketke ainalý mindettemesin aldy. Al qazirgi tańda Qazaqstanda kómir energetikasy 70%-ti quraidy.
"Degenmen kómirteksizdendirý bul - tek kómirden bas tartý emes. Bul - munai men gazdan paida tapqan eski energetikalyq modelden elektroenergetikanyń róli ózgeshe jańa ekonomikalyq modelge aýysý. Tarifter de basqa. Búginde tarif aitarlyqtai joǵary emes, onyń kóterilýi halyq pen ónerkásip úshin jaqsy jańalyq emes, árine. Biraq bul shyndyq", - dedi agenttik basshysy.
Buǵan deiin Qazaqstan prezidenti Qasym-Jomart Toqaev úkimet pen "Samuryq-Qazyna" ulttyq ál-aýqat qoryna elde atom energetikasyn damytý múmkindigin zertteýdi tapsyrdy. Resei basshysy Vladimir Pýtin 30 qyrkúiekte XVII óńiraralyq yntymaqtastyq forýmynda RF sheteldik seriktesterge, sonyń ishinde Qazaqstanǵa, AES qurylysyna óz járdemi men qoldaýyn usynatynyn málimdedi.
