Qazaqstandyq ǵalymdar koronavirýsqa qarsy ózderi ázirlegen inaktivtelgen nemese "óltirilgen" vaktsinany klinikaǵa deiingi synaqtan ótkize bastady, dep habarlaidy "Ult aqparat" bilim jáne ǵylym ministrliginiń baspasóz qyzmetine silteme jasap.
Dúniejúzilik densaýlyq saqtaý uiymy qazaqstandyq ǵalymdardyń vaktsinasyn tirkep, óziniń resmi saityna ornalastyrdy. Osylaisha, ol klinikaǵa deiingi synaq ruqsat etilgen, COVID-19-ǵa qarsy vaktsinalyq kandidattardyń tizimine enip otyr.
Inaktivtelgen vaktsinany bilim jáne ǵylym ministrligi ǵylym komiteti biologiialyq qaýipsizdik problemalary ǵylymi-zertteý institýtynyń qyzmetkerleri ázirlegen.
Baspasóz qyzmetiniń aqparatynsha, otandyq vaktsina Qazaqstan aýmaǵynda aýyrǵandardan bólingen virýs shtammy negizinde jasaldy.
Bilim jáne ǵylym ministri Ashat Aimaǵambetov institýt qyzmetkerlerin quttyqtady.
"Bul - qazaqstandyq ǵylymnyń memleketimizdiń biologiialyq qaýipsizdigin qamtamasyz etýge qosqan eleýli úlesi, sondai-aq eldiń myqty ǵylymi áleýetiniń aiǵaǵy. Institýt ujymy qaýipti jáne asa qaýipti aýrýlarǵa qarsy vaktsina túrlerin ázirleýde jetekshi ról atqaratynyn taǵy bir márte kórsetti", - delingen habarlamada.
Endi ǵalymdar birqatar klinikaǵa deiingi jáne klinikalyq synaqtar ótkizýi tiis.
"Osylaisha Qazaqstan resmi túrde koronavirýsqa qarsy vaktsina ázirleýshilerdiń qataryna endi", - dep málimdedi baspasóz qyzmetinen.
Aita ketsek, buǵan deiin biologiialyq qaýipsizdik problemalary ǵylymi-zertteý institýty asa qaýipti jáne qaýipti aýrýlarǵa qarsy 67 vaktsina túrin, 15 test júiesi men otyzdan asa biopreparat ázirlep, óndiriske engizdi. Olardyń arasynda joǵary patogendi qus tumaýyna, joǵary patogendi dońyz tumaýyna, nodýliarly dermatitke qarsy vaktsinalar bar.
