2025 jylǵa deiin Qazaqstan men Resei shekarasyndaǵy 27 ótkizý pýnktin jańartý josparlanýda. Jobany 5 kezeńde júzege asyrý kózdelgen. Bul týraly QR Indýstriia jáne infraqurylymdyq damý ministrligi Avtomobil joldary komitetinen málim etti, dep habarlaidy "Ult aqparat".
Komitet aqparatyna súiensek, búgingi tańda Qazaqstan men Resei shekarasynda 30 ótkizý pýnkti bar. Onyń 17-si – kópjaqty, 13-i – ekijaqty ótkizý pýnkti. Indýstriia jáne infraqurylymdyq damý ministrligi men Ulttyq qaýipsizdik komiteti ókilderinen quralǵan komissiia jumys istep turǵan ótkizý pýnkteriniń tehnikalyq jaǵdaiyn teksergen. Nátijesinde, ótkizý pýnkteriniń júktemesin jáne ótkizý múmkindigin eskere otyryp, rekonstrýktsiiany talap etetin 27 pýnktti anyqtady.
«Osylaisha, «Syrym», «Tasqala», «Qosaq», «Úrlitóbe» «Jańa jol», «Álimbet», «Qaraqoǵa», «Shaǵan», «Qurmanǵazy», «Úbe», «Sharbaqty», «Qyzyljar», «Qairaq», «Aýyl», «Bidaiyq», «Jánibek», «Aqsai», «Qondybai», «Aiat», «Aqbalshyq», «Naiza», «Jezkent», «Qoianbai», «Baitanat», «Amangeldi», «Obaǵan» jáne «Jelqýar» beketteri 2025 jylǵa deiin kezeń-kezeńimen jańartý jumystarynan ótetin bolady», - delingen habarlamada.
Sonymen qatar, 2019 jyldyń qarashasynda ótken Qazaqstan men Resei arasyndaǵy Óńiraralyq yntymaqtastyq forýmynda QR Indýstriia jáne infraqurylymdyq damý ministrligi men RF Kólik ministrligi arasynda memlekettik qazaq-orys shekarasyndaǵy ótkizý beketteriniń jumysy boiynsha birlesken is-sharalar týraly baǵdarlamaǵa qol qoiylǵan bolatyn. Qujatqa sáikes jumys istep turǵan ótkizý pýnkteriniń jaǵdaiyna taldaý júrgizý, 2020 jáne 2025 jyldar aralyǵynda qazaq-orys shekarasyndaǵy ótkizý pýnkterin damytýdyń Jol kartasyn ázirleý kózdelgen.
