Qazaqstan Prezidenti memlekettik nagradalar men syilyqtar tapsyrý rásimine qatysty, dep habarlaidy "Ult aqparat" Aqordaǵa silteme jasap.
Nursultan Nazarbaev saltanatty rásimge qatysýshylardy Táýelsizdik kúnimen quttyqtap, bul asa mańyzdy tarihi oqiǵa jańa Qazaqstannyń damýyna jol ashyp, biregei múmkindikter týǵyzǵanyn atap ótti.
– Biz álemniń ozyq damyǵan 30 eliniń qataryna qosylýdy maqsat etken qýatty ári ornyqty memleket qurdyq. Biz damý jolyn ustana otyryp, túrli salalar men baǵyttar boiynsha zor tabysqa jettik. Bul jetistikterge barsha qazaqstandyqtardyń kúsh-jigeri men jasampaz qýatynyń arqasynda qol jetkizdik, – dedi Elbasy.
Qazaqstan Prezidenti memleketimizde jyl saiyn elimizdiń gúldenýine zor úles qosqan azamattar nagradalarmen marapattalyp, syilyqtarǵa ie bolatynyn aityp, mundai marapattar eń úzdikterge, kásibi turǵydan biik belesti baǵyndyrǵan jáne qoǵam tarapynan moiyndalǵan tulǵalarǵa tapsyrylatynyn atap ótti.
– Sizder óskeleń urpaq pen elimizdiń barsha azamattaryna aianbai qyzmet etýdiń, airyqsha eńbeksúigishtiktiń jáne naǵyz patriotizmniń jarqyn úlgisin kórsetip kelesizder. Sizderdiń jetistikterińiz memlekettiń eń joǵary baǵasyna jáne halyqtyń qurmetine laiyq, – dedi Nursultan Nazarbaev.
Memleket basshysy «Qazaqstannyń Eńbek Eri» ataǵyn «Aqtóbe qalasy sal aýrýyna shaldyqqan azamattardy qoldaý ortalyǵy» qoǵamdyq birlestiginiń tóraiymy Quralai Bazarbaiqyzy Báimenovaǵa berip, onyń ómir qiynshylyqtaryna moiymai, taǵdyr taýqymetin tartqan adamdarǵa kómek kórsetip júrgenin atap ótti. Qazirgi kezde Q.Báimenova múmkindigi shekteýli jandarǵa qoldaý kórsetý jónindegi jobalardy iske asyrýda.
– «Qazaqstannyń Eńbek Eri» mártebeli ataǵyn Alina Robertovna Soloveva ielenedi. Ol – ulaǵatty ustaz, óz óńirindegi bilim berý júiesin damytýǵa mol úles qosty. A.Soloveva jańashyl ári shyǵarmashyl pedagog retinde álemniń úzdik tájiribeleri men zamanaýi tehnologiialaryn oqý-tárbie úderisine belsendi engizip keledi, – dedi Qazaqstan Prezidenti.
Elbasy «Qazaqstannyń Eńbek Eri» ataǵymen Sairambai Áliqululy Dónenbaevty marapattai otyryp, onyń iri sharýa qojalyǵynyń basshyly retinde adal eńbek etip, týǵan jeriniń damýyna jáne órkendeýine aitarlyqtai úles qosyp kele jatqanyn aitty.
– II dárejeli «Barys» ordenimen Abai Qabataiuly Baigenjin marapattalady. Onyń búkil kásibi qyzmeti meditsina salasymen bailanysty. Ol elimizdiń densaýlyq saqtaý salasynyń jetekshi mekemelerin qurý jáne damytý isine zor úles qosty, – dedi Nursultan Nazarbaev.
Elbasy Qazaqstannyń halyq jazýshysy Qabdesh Jumadildi II dárejeli «Barys» ordenimen marapattap, onyń tarihi romandary men shyǵarmalary álemniń kóptegen tiline aýdarylǵanyn jáne qazaq ádebietiniń altyn qoryna engenin atap ótti.
– III dárejeli «Barys» ordeni Oleg Vladimirovich Danilenkoǵa tabys etiledi. Ol shirek ǵasyrdan astam ýaqyt boiy elimizdiń aýyl sharýashylyǵynda jemisti eńbek etýde. Oleg Danilenko basqaratyn argofirma asyl tuqymdy mal sharýashylyǵynda joǵary nátijelerge qol jetkizip, aýyldyń áleýmettik salasyna laiyqty qoldaý kórsetip keledi, – dedi Memleket basshysy.
Qazaqstan Prezidenti III dárejeli «Eńbek Dańqy» ordenin «Kazakhmys Smelting» jaýapkershiligi shekteýli seriktestigi mys qorytý zaýytynyń balqytýshysy Temirjan Sabyrjanuly Bekjanovqa tabys etti.
Nursultan Nazarbaev Astana qalalyq Ishki ister departamenti Jol-patrýldik politsiiasynyń inspektory Azamat Qanatuly Baltabaevty II dárejeli «Aibyn» ordenimen marapattai otyryp, qaharmandyqqa baýlityn mamandyq ieleri azamattarymyzdyń qaýipsizdigi men tynyshtyǵyn qamtamasyz etý jolynda árdaiym erlik kórsetýge ázir ekenin aitty.
– Qiyn jaǵdaida, ózine qaýip tónip tursa da, Azamat tórt adamnyń, sonyń ishinde bir balanyń ómirin qutqaryp qaldy, – dedi Elbasy.
Memleket basshysy adam ómirin qutqaryp, erlik pen batyldyq tanytqany úshin III dárejeli «Aibyn» ordenimen Ishki ister ministrliginiń Qyzylorda oblystyq Tótenshe jaǵdailar departamentiniń №2 órtke qarsy mamandandyrylǵan bólimshesiniń komandiri Ermekbek Pazlievti marapattady.
Sonymen qatar, Qazaqstan Prezidenti marapattalýshylar qatarynda ǵylym, mádeniet jáne óner qairatkerleri, bilim berý jáne densaýlyq saqtaý salasynyń qyzmetkerleri, kásipkerler men óndirisshiler, áskeriler men quqyq qorǵaý organdarynyń qyzmetkerleri, eńbek ardagerleri, sportshylar men memlekettik qyzmetshiler bar ekenin atap ótti.
– Búgin biz eń úzdikterdi, sonyń ishinde eliniń gúldenýi men halqynyń ál-aýqatynyń artýy úshin bar bilimin, qýaty men kúshin jumsaýǵa ázir óz Otanynyń naǵyz patriottaryn marapattap otyrmyz. Sizder óz isterińizge adaldyq tanytyp, eńbekti qadirlep, erlik kórsetý arqyly áriptesterińizdiń arasynda bedelge ie bolyp, qoǵamymyzdyń qurmetine bólendińizder, – dedi Nursultan Nazarbaev.
Elbasy ádebiet pen óner salasyndaǵy memlekettik syilyqty Tynyshtyqbek Ábdikákimovke, Aqushtap Baqtygereevaǵa jáne Ótegen Oralbaevqa tabys etip, azamattarymyzdyń rýhani turǵydan jańǵyrýy men shyǵarmashylyq áleýetiniń damýy elimizdiń mańyzdy basymdyǵy bolyp sanalatynyn aitty.
– Memlekettik syilyqtar «Abai» operasyn qoiǵan jáne «Anaǵa aparar jol» filmin túsirgen shyǵarmashylyq ujymdarǵa beriledi. Bul kórkemdik deńgeii joǵary týyndylar Qazaqstan mádenieti men ónerin álemdik deńgeide ilgeriletýge septigin tigizedi, – dedi Memleket basshysy.
Budan bólek, rásim barysynda I, II, III dárejeli «Barys» ordenderi eńbek ardageri J.S.Káribjanovqa, «Qazaqstan temir joly» UK» AQ basqarma tóraǵasy S.M.Myńbaevqa, «Qazaq ulttyq óner ýniversiteti» RMM professory S.Sh.Orazalyǵa, Ortalyq sailaý komissiiasynyń tóraǵasy B.M.Imashevke tabys etildi.
«Parasat» ordenimen Soltústik Qazaqstan oblysynyń ákimi Q.I.Aqsaqalov, Qorǵanys jáne aeroǵarysh ónerkásibi ministri B.B.Atamqulov, Memlekettik qyzmet isteri jáne sybailas jemqorlyqqa qarsy is-qimyl agenttigi apparatynyń jetekshisi S.Q.Ahmetjanov, «Abai atyndaǵy Qazaq ulttyq pedagogikalyq ýniversiteti» RMK rektory T.O.Balyqbaev, «Qazaqstan Respýblikasy Prezidentiniń Teleradiokesheni» KEAQ bas direktory E.Q.Bekhojin, Premer-Ministrdiń orynbasary E.A.Dosaev, Jambyl oblysynyń ákimi A.I.Myrzahmetov, «Uniserv» JShS baqylaý keńesiniń tóraǵasy N.Sátbaev, Mańǵystaý oblysynyń ákimi E.L.Toǵjanov marapattaldy.
«Qurmet» ordenimen marapattalǵandar qatarynda Densaýlyq saqtaý ministri E.A.Birtanov, «Qazaq ulttyq horeografiia akademiiasy» KEAQ oqytýshysy L.V.Makartseva, Ulttyq ekonomika ministri T.M.Súleimenov, N.Tilendiev atyndaǵy akademiialyq folklorly-etnografiialyq orkestriniń bas dirijeri D.N.Tilendieva bar.
«Qazaqstannyń eńbek sińirgen qairatkeri» ataǵy kino ártisi S.I.Eslámovaǵa jáne «Qurmanǵazy atyndaǵy Qazaq ulttyq konservatoriiasy» RMM aǵa oqytýshysy Ia.S.Rýdkovskiige berildi.
Áskeri jáne qyzmettik boryshyn úlgili atqarǵany, zań men quqyq tártibin qamtamasyz etý, eldiń ulttyq qaýipsizdigi men qorǵanys qabiletin nyǵaitý kezinde kórsetken erligi men qajyrlylyǵy úshin II dárejeli «Dańq» ordenimen jáne «Jaýyngerlik erligi úshin» medalimen áskeri qyzmetshiler men quqyq qorǵaý organdary ókilderiniń bir toby, atap aitqanda Ulttyq qaýipsizdik komitetiniń Soltústik Qazaqstan oblysy boiynsha departamentiniń bastyǵy A.A.Aqshaev, Qorǵanys ministriniń orynbasary M.M.Altynbaev, Almaty qalasynyń prokýrory B.Q.Júiriktaev, Qazaqstan Respýblikasy Qarýly Kúshteri Áýe qorǵanysy kúshteri Áskeri-áýe kúshteriniń qolbasshysy D.J.Qosanov, Memlekettik kúzet qyzmeti Nysandardy qorǵaý qyzmeti «Aibyn» Prezident polki» rásimdik batalony qurmet qaraýyl rotasynyń bólimshe komandiri Á.A.Tórebekov marapattaldy.
Sonymen qatar, rásim barysynda Qazaqstan Respýblikasynyń ádebiet pen óner salasyndaǵy 2018 jylǵy memlekettik syilyq «Abai» operasy úshin T.N.Álpiev, S.Á.Baiǵojin, Ǵ.A.Ahmadiiarov engen avtorlar ujymyna jáne «Anaǵa aparar jol» tolyqmetrli kórkem filmi úshin A.Q.Sataev, Á.N.Nazarbaeva, A.B.Nógerbek, Á.E.Ahmetov engen avtorlar ujymyna tabys etildi.
Sońynda Qazaqstan Prezidenti memlekettik nagradalar men syilyqtardyń basty merekemiz – Táýelsizdik kúni qarsańynda berilýiniń simvoldyq mánine toqtaldy.
– Sizder memlekettiń osy joǵary baǵasyna laiyqty bolyp, Qazaqstan halqynyń igiligi jolynda qyzmet ete beredi dep senemin. Jastarymyz ózderińiz salǵan jolmen júrip, jańa belesterdi baǵyndyratyn bolady. Otanymyzdyń qaýipsizdigi men baqýattylyǵy sizderdiń qoldaryńyzda! Osy joǵary ári mártebeli missiiaǵa árqashan laiyq bolyńyzdar! – dedi Nursultan Nazarbaev.
