Elordada ótip jatqan halyqaralyq neirohirýrgiia forýmynyń qatysýshylaryna QR Prezidenti Qasym-Jomart Toqaev quttyqtaý hat joldady, dep habarlaidy QazAqparat.
Memleket basshysynyń quttyqtaýyn forýmǵa qatysýshylarǵa QR Premer-Ministriniń orynbasary Eraly Toǵjanov oqyp berdi.
«Qurmeti forýmǵa qatysýshylar! Sizderdi halyqaralyq neirohirýrgiia forýmynyń jáne osyǵan orai uiymdastyrylǵan taqyryptyq kinofestivaldiń ashylýymen quttyqtaimyn. Álemge tanymal akademik A. Konovalov bastaǵan bilikti ǵalymdardyń búgingi basqosýy otandyq densaýlyq saqtaý isin damytýǵa tyń serpin bereri sózsiz», - dep jazylǵan Prezidenttiń quttyqtaý lebizinde.
Sondai-aq, Qasym-Jomart Toqaev hatynda atalmysh sharany uiymdastyryp otyrǵan Ulttyq neirohirýrgiia ortalyǵy Qazaqstanda neirohirýrgiia salasynyń alǵa basýyna zor úles qosyp kele jatqanyn atap ótti.
«Bul mekeme Ortalyq Aziiadaǵy úzdik meditsina uiymdarynyń qataryna kiredi. Byltyr óńirde alǵashqylardyń biri bolyp osynda «gamma-pyshaq» qondyrǵysy ornatyldy. Sońǵy bir jyl ishinde 500-ge jýyq asa kúrdeli operatsiia jasaldy. Elimizde dúniejúzine áigili mamandarmen tyǵyz qarym-qatynas ornatyp, tájiribe almasýǵa, sondai-aq, otandyq neirohirýrgiiaǵa ozyq tehnologiialardy engizýge barlyq jaǵdai jasalǵan. 2025 jylǵa deiingi Ulttyq damý josparynda densaýlyq saqtaý júiesin damytý basty basymdyqtyń biri retinde belgilengen. Bizdiń dárigerlerimiz halyqqa joǵary sapaly qyzmet kórsetýde. Qazaqstan aimaqtaǵy meditsnalyq týrizmniń ortalyǵyna ainalyp keledi. Búgingi jiynda qazirgi zamanǵy ǵylymi jańalyqtardy el igligine baǵyttaityn kóptegen tyń ideialar aitylady dep senemin», - delingen Prezident quttyqtaýynda.
