Foto: Akorda.kz
Qazaqstan qandai da bir odaqtas memleketter qurýǵa nemese olardyń quramyna kirýge nietti emes. Bul týraly Prezidenttiń baspasóz hatshysy Rýslan Jeldibai áleýmettik jelidegi paraqshasynda jazdy, dep habarlaidy "Ult aqparat".
"Ózderińizge málim, Memleket basshysy jaqynda Máskeý qalasynda ótken II Eýraziialyq ekonomikalyq forýmǵa qatysty. Prezident jiyn barysynda búginde sarapshylar qaýymdastyǵy keńinen talqylap jatqan birqatar málimdeme jasady.
EAEO aiasyndaǵy integratsiia tek qana ekonomikalyq sipatta ǵana júrýi kerek. Bul – Prezidenttiń negizgi ustanymy. Onyń sheńberinen shyǵý uiymnyń jarǵylyq qujattarynyń maqsattaryna, printsipteri men mindetterine qaishy keledi.
Prezident atap ótkendei, ekonomikalyq integratsiia – bul túpki maqsat emes, ol ekonomikany damytýdyń jáne halyqtarymyzdyń ál-aýqatyn arttyrýdyń negizgi quraldarynyń biri. Iaǵni, uiym aiasynda qabyldanatyn kez kelgen sheshim onyń árbir múshesine jáne, eń aldymen, olardyń azamattaryna paidasyn tigizýi tiis" - dep jazdy Jeldibai.
Sonymen qatar, ol túrli deńgeidegi integratsiia máselesi qozǵalǵanyn atap ótti.
"Búginde EAEO-nyń eki múshesi – Resei men Belarýs ózara yqpaldastyqtyń joǵary deńgeiine shyqty. Bul – erekshe pretsedent. Memleket basshysynyń paiymynsha, shyn máninde, bir halyq jáne bir memleket týraly sóz bolyp otyr. Osy rette múlde basqa maqsattardy kózdegen eki túrli integratsiialyq joba sheńberindegi bastamalardyń ara-jigin ajyratý asa mańyzdy.
Bizdiń elimizge keletin bolsaq, Qazaqstan qandai da bir odaqtas memleketter qurýǵa nemese olardyń quramyna kirýge nietti emes jáne ony josparlap otyrǵan joq" - dep túiindedi Prezident baspasóz hatshysy.
