«Qazaqstan muǵalimi» ulttyq syilyǵyna kez kelgen pedagog óz betimen ótinim jibere alady. Ol úshin mektep basshylyǵy men salaǵa jaýap beretin vedomstvonyń usynymy qajet emes, dep habarlaidy QazAqparat.
Bul týraly «Qoǵamdyq mańyzy bar bastamalardy damytý qory» jeke qorynyń tóraǵasy Ermek Májitov ortalyq kommýnikatsiialar qyzmetinde aitty.
«Álem muǵalimi» jahandyq syilyǵy – muǵalimderge arnalǵan Nobel syilyǵynyń balamasy. Júlde qory – 1 mln dollar. 2019 jyly «Qoǵamdyq mańyzy bar bastamalardy damytý» qorynyń quryltaishysy Áliia Nursultanqyzynyń bastamasy boiynsha osy jahandyq konkýrsty uiymdastyrýshy Varkey qorymen memorandýmǵa qol qoiylǵan bolatyn. Sonyń aiasynda «Qazaqstan muǵalimi» ulttyq syilyǵyn iske asyrý bastamasy kóterilgen edi», - dep bastady qor jetekshisi.
Onyń aitýynsha, biyl úshinshi ret ótetin konkýrstyń maqsaty – pedagog eńbeginiń bedelin, pedagog mártebesin kóterý, muǵalimderimizi halyqaralyq deńgeige shyǵarý.
«Biz muǵalimderimiz álemdik syilyqqa qatysyp, halyqaralyq deńgeide tanylýǵa laiyq dep esepteimiz. «Qazaqstan muǵalimi» ulttyq syilyǵy osymen úshinshi maýsymda ótip jatyr jáne qujattardyń qabyldaý sáýir aiynda bastalǵan, 15 tamyzǵa deiin jalǵasady.
Jobanyń basty ereksheligi, oǵan kez kelgen muǵalim óz betimen qatysa alady. Iaǵni bilim berý mekemesi basshylyǵynyń, bilim berý bólimderi men basqarmalarynyń usynymy talap etilmeidi. Baiqaý kezinde muǵalimderdiń mekteptegi kásibi biliktiliginen bólek qoǵamdyq ómirdegi belsendiligi, bet-beinesi de eskeriledi», - dedi Ermek Májitov.
Aqtyq synǵa ótetin 10 nominatty 50 úzdik muǵalimnen jasaqtalǵan táýelsiz qazylar akademiiasy anyqtaidy.
«Aqtyq synǵa 10 úzdik ustaz iriktelip, 24 qyrkúiekte Almaty qalasyndaǵy marapattaý sharasyna shaqyrylady. Olardyń bári «Álem muǵalimi-2022» syilyǵyna qatysatyn nominant atanady. «Qazaqstan muǵalimi» ulttyq syilyǵynyń ambassadory, jeńimpaz «Qoǵamdyq mańyzy bar bastamalardy damytý» qorynyń qurylaityshysynan 10 myń dollar kóleminde syilyq alady. Aqtyq synǵa shyqqan qalǵan 9 muǵalim baǵaly syilyqtarman marapattalady», - dedi qordyń direktory.
