Qoǵamdyq mańyzdy bastamalardy damytý qory «Qazaqstan muǵalimi 2020» ulttyq syilyǵyn tabystaidy. Jeńimpaz $10 000 kólemindegi qarjylai júldege ie bolady, sonymen qatar finalǵa qatysýshy 10 úzdik ustazdyń saýalnamasy Nobel syilyǵynyń pedagogtarǵa arnalǵan teńdessiz «Álem muǵalimi» jahandyq syilyǵynyń irikteý kezeńine jiberiledi, dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
2020 jyldan bastap «Úzdik pedagog 2019» respýblikalyq jarysynyń qatysýshylarynan basqa, eńbek ótili úsh jyldan kem emes, bastapqy jáne orta bilim mekemeleriniń pedagogy «Qazaqstan muǵalimi 2020» ulttyq syilyǵyna úmitker ola alady.
Oǵan qatysý úshin www.teacherprize.kz resmi saitynda saýalnama toltyrý qajet. Saýalnamalar 2020 jyldyń 1 mamyrynan 1 qyrkúiegine deiin qabyldanady.
«Saýalnamada baǵalanatyn negizgi kriteriilerdiń biri - pedagogtyń qoǵamdyq mańyzy bar áleýmettik isterge qatysýy. Qoǵamdyq jobalaý oqýshylardyń tulǵalyq qalyptasýynda úlken ról atqarady. Pedagogtyń áleýmettik jobalarda eńbektenýi balalardy biriktirýge, olardyń qarym-qatynasyn shyǵarmashylyqqa toltyrýǵa, balalardy paidaly isterge qosýǵa jáne olardyń sana-sezimin tárbieleýge múmkindik beredi. Úmitkerlerdi ádil irikteýdi táýelsiz qazylar akademiiasy júrgizedi. Olardyń qataryna Bilim jáne ǵylym ministrliginiń, ata-analar qaýymdastyǵynyń ókilderi, bilim salasyndaǵy táýelsiz sarapshylar, pedagogikanyń jetekshi mamandary, qoǵam qairatkerleri, elimizdiń filantroptary kiredi. Halyqaralyq aýditorlyq kompaniia irikteý úderisiniń aýditi, baǵalaýy jáne testileýine qatysyp, iriktelgen úmitkerlerdiń bedeli men ómirbaiandaryna tereńdetilgen sholý júrgizedi. Irikteý Varke qorynyń (Varkey Foundation) ornatqan kriteriilerine sáikes ótedi» delingen habarlamada
«Qazaqstan muǵalimi 2019» ulttyq syilyǵynyń jeńimpazy qoǵamdyq mańyzdy bastamalardy damytý qorynyń $10 000 kólemindegi qarjylai júldesin jáne «Jahandyq syilyqtyń Qazaqstandaǵy ambassadory» ataǵyn ielenedi. Buǵan deiin bul júldeni Nur-Sultan qalasy daryndy jasóspirimderge arnalǵan «Bilim-innovatsiia» litsei-internatynyń matematika páni muǵalimi Gúl Mýammer jeńip alǵan. Gúl Mýammer Jahandyq syilyq jeńimpazynyń esimi jariialanatyn bilim jáne daǵdy búkilálemdik forýmyna (Global Education and Skills Forum) qatysady.
Syilyq jaily tolyq aqparatty 8 702 278 70 78 nómiri arqyly alýǵa bolady.
