Ministrlikterde qansha memlekettik qyzmetshi jumysynan bosatylatyny osy jyldyń jeltoqsan aiyna deiin belgili bolady. Bul keibir ókilettikterdi jergilikti atqarýshy organdarǵa berýmen bailanysty bolyp otyr, dep habarlaidy Sputnik Qazaqstan.
Ulttyq ekonomika vitse-ministri Aigúl Shaiymova qansha memlekettik qyzmetshi qysqartylatynyn aitqan joq. Sebebi qazir fýnktsionaldy taldaý júrgizilip jatqanǵa uqsaidy. Ministrlikterde qysqaratyn shtat sany tek sonyń qorytyndysynan keiin belgili bolmaq.
"Keshendi taldaý osy jyldyń jeltoqsanyna deiin aiaqtalady", - dedi Shaiymova májilis kýlýarynda.
Ol memlekettik organda bir fýnktsiiany bir ǵana adam atqarmaitynyn atap ótti. Bir qyzmetke birneshe adam jumyldyrylýy múmkin, sol sebepti ár fýnktsiiany jeke dara qarastyrý kerek.
"Bul bir kúnniń jumysy emes. Belgili bir ýaqytty qajet etedi. Parlamentte zań jobasy qaralyp bitkenge deiin bul jumys aiaqtalady dep oilaimyn", - dedi vitse-ministr.
Shaiymova bul áleýmettik másele bolǵandyqtan, memlekettik qyzmetshiler mehanikalyq túrde jappai qysqartylmaidy dep sendirdi.
Qysqartý nemen bailanysty?
Májiliste keibir zańnamalyq aktilerge memlekettik basqarý deńgeileri arasynda ókilettikterdi qaita bólý máseleleri boiynsha ózgerister engizý týraly zań jobasy tanystyryldy. Oǵan sáikes, úkimet, ministrlikter men ákimdikter arasynda ókilettikter qaita bólinedi.
Úkimetten ministrlikterge 88 ókilettik, ortalyqtan óńirlerge úsh fýnktsiia, oblystyq deńgeidegi keibir ókilettikter aýdandyq deńgeige beriledi. Sondai-aq, ministrlikter arasynda eki fýnktsiia qaita bólinedi.
Qysqartylǵan shtattan únemdelgen aqsha bilikti, kásibi mamandardyń jalaqysyn arttyrýǵa jumsalady.
