QR Ulttyq qaýipsizdik komiteti tóraǵasynyń orynbasary - Shekara qyzmetiniń direktory Darhan Dilmanov Qazaqstan men Resei shekarasynda kólik keptelisi neden týyndaitynyn túsindirdi, dep habarlaidy QazAqparat.
«Tiisti taldaý sharalaryn júrgizdik. Bizde ótetin kólik sany eleýli túrde artqan 4 negizgi ótkizý beketi («Tasqala», «Syrym», «Jaisań», «Qairaq» beketteri) bar. Qazaqstan arqyly Reseige baǵyttalǵan júk kólikteriniń negizgi aǵyny osy tórt beketke salmaq túsirip tur. Atap aitqanda, jolaýshylar men kólik aǵynyna biz daiyn bolmadyq, sebebi Ózbekstan jolaýshylar jáne júk tasymalyn eselep arttyrdy. Eger de taýar ainalym milliard dollar bolsa, al qazir úsh jarym milliardqa jetti. Sáikesinshe, avtokólik sany da úsh esege kóbeidi. Bes jyl burynǵy infraqurylym talapqa sai bolsa, búginde endi infraqurylymdy kúsheitý qajettigi bar», - dedi Dilmanov Parlament Senaty Halyqaralyq qatynastar, qorǵanys jáne qaýipsizdik komitetiniń keńeitilgen otyrysynda.
Onyń sózine qaraǵanda, QR Indýstriia jáne infraqurylymdyq damý ministrlimen, sondai-aq ózge de memorgandarmen birlese tiisti Jol kartasy ázirlendi. Onyń aiasynda jaqyn arada jańǵyrtý sharalary júrgiziletin ótkizý beketteri aiqyndaldy. Osy baǵytta qarjylandyrý bólinip, aldaǵy 2 jylda atalǵan máseleler sheshimin tabady dep kútilýde.
Budan buryn habarlanǵandai, Senatta «2006 jylǵy 3 qazandaǵy QR Úkimeti men RF Úkimeti arasyndaǵy Qazaqstannyń jáne Reseidiń shekara mańyndaǵy aýmaqtary turǵyndarynyń Qazaqstan-Resei memlekettik shekarasyn kesip ótý tártibi týraly kelisimge ózgerister engizý týraly hattamany ratifikatsiialaý týraly» zań jobasy talqylandy.
