Qazaqstan men Ózbekstan bilim berý salasyndaǵy yntymaqtastyq sheńberinde jańa kelisimge qol qoiady.
Bul týraly QR Bilim jáne ǵylym ministri Ashat Aimaǵambetov pen Ózbekstan Respýblikasynyń Halyqqa bilim berý ministri Bahtier Saidovtyń Nur-Sultan qalasyndaǵy kezdesýi barysynda málim boldy, dep habarlaidy QazAqparat.
Ózbekstannan kelgen delegatsiianyń basty maqsaty – qazaqstandyq bilim berý júiesine engizilip jatqan jańashyldyqtarmen tanysý.
Ózbek tarapy buǵan deiin eki el arasyndaǵy ózara is-qimyl týraly kelisimge 1994 jyly qol qoiylǵanyn atap ótti. Áńgime barysynda ministr jańartylǵan qujat eki respýblika arasyndaǵy bilim berý salasyndaǵy yntymaqtastyqty nyǵaitýǵa jáne jańa deńgeige shyǵarýǵa yqpaldasatynyn atap ótti.
Aita keteiik, Qazaqstanǵa kelgen Ózbekstan Respýblikasynyń Halyqqa bilim berý ministri eń aldymen elordalyq mektepterdi aralady.
«Meniń oiymsha, kelisim jobasyn daiyndaý kezinde eki el arasyndaǵy bilim berý salasyndaǵy yntymaqtastyqtyń basym baǵyttarynyń barlyq spektri qamtylǵany jón. Bul — muǵalimderdi daiarlaý, biliktilikti arttyrý, tájiribe almasý máseleleri. Biz muǵalimderimizdiń Qazaqstanǵa saparyn uiymdastyryp, qazaqstandyq muǵalimderdi Ózbekstanǵa shaqyra alar edik. Bul tájiribe men pikir almasý barysynda paidaly bolady dep oilaimyn. Men birqatar qazaqstandyq muǵalimmen sóilestim. Olardyń árqaisysy jumystaryn zor qulshynyspen atqaryp, óz eliniń bolashaǵy úshin alańdaitynyn baiqadym. Muǵalimder bilimdi qalai bergen jón, oqýshyny tulǵa retinde qalyptastyrýdyń mańyzdylyǵy týraly oilanady eken», – dedi Ózbekstan Respýblikasynyń Halyqqa bilim berý ministri Bahtier Saidov.
Astanalyq mektepterdi aralaý barysynda Bahtier Saidovqa oqý protsesine integratsiialanǵan bilim berý baǵdarlamalary men tsifrlyq jobalar tanystyryldy. Sondai-aq B. Saidov qazaqstandyq mektepterdegi memlekettik-jekemenshik áriptestik jáne jan basyna qarjylandyrý júiesimen tanysty.
B. Saidov Ózbekstanda mektepterdegi bilim berý salasyn jetildirý úshin jeke mektepter arasyndaǵy básekelestikti kúsheitýge múmkindik beretin qazaqstandyq memlekettik-jekemenshik áriptestik (MJÁ) júiesi de, sonymen birge jan basyna shaqqandaǵy qarjylandyrýǵa kóshý de zerdelenetinin atap ótti.
