«Qazaqfilm» men «Belarýsfilm» birlesip «Leto 1941 goda» atty tarihi film túsirdi. Bul týraly Qazaqstandaǵy Belarýs Respýblikasynyń Tótenshe jáne Ókiletti elshisi Pavel Ýtiýpin málim etti, dep habarlaidy QazAqparat.
«Ekinshi dúniejúzilik soǵys - Belarýs pen Qazaqstanǵa ortaq qasiret. Tiisinshe Jeńis te - búkil KSRO elderine ortaq. Ókinishke qarai, Uly otan soǵysyna attanǵan árbir úshinshi belarýs oralmady. Soǵys kezinde Belarýs aýmaǵyn azat etý jolynda kúresken 80-nen astam qazaqstandyq túrli dárejedegi marapatqa ie boldy. Uly Otan soǵysy taqyryby ortaq bolǵandyqtan Belarýs pen Qazaqstan birlesken jobalardy qolǵa alyp jatyr. Sonyń biri - biyl jazda «Qazaqfilm» men «Belarýsfilm» birlesip «Leto 1941 goda» atty film túsirdi. Jýyrda tusaýkeseri ótedi dep josparlanyp otyr», - dedi Pavel Ýtiýpin elordada bastalǵan Belarýs eliniń mádeniet kúnderi saltanatty sharasy barysynda.
Elshiniń málimetinshe, atalǵan film qazaqstandyq partizan Ádi Sháripov týraly bolmaq.
Buǵan deiin habarlaǵanymyzdai, Qazaqstanda Belarýs respýblikasynyń mádeniet kúnderi bastaldy.
Mádeniet kúnderi aiasynda elorda jurtshylyǵy Belarýs filmderin tegin tamashalai alady.
Odan bólek, astanalyqtar nazaryna kórme men merekelik kontsert usynylady.
