Májiliste «Qazaqstan men Ázerbaijan úkimetteriniń kóshi-qon salasyndaǵy yntymaqtastyq týraly kelisimdi ratifikatsiialaý týraly» zań jobasy maquldandy, dep habarlaidy QazAqparat.
QR Ishki ister ministri Erlan Turǵymbaevtyń aitýynsha, kelisimge 2019 jyly 14 qazanda Baký qalasynda qol qoiylǵan. Al Ázerbaijan parlamenti kelisimdi 2019 jyly 14 jeltoqsanda bekitken.
«Bul qujat azamattyq týraly aqparat almasýǵa, zańsyz kóshi-qonmen kúresýge múmkindik beredi. Naqty aitsaq, statistika men aqparat almasýǵa, azamattar týraly jeke málimet alýǵa, tájiribe almasý, praktikalyq kómek kórsetýge, zańsyz kóshi-qon joldaryn joiýǵa múmkindik beredi. Qazaqstan men Ázerbaijan azamattarynyń quqyqtyq mártebesi anyqtalady», - dep túsindirdi ministr Májilistiń jalpy otyrysynda.
Onyń aitýynsha, 2018 jyly Qazaqstanǵa Ázerbaijannan 50 myńǵa jýyq azamat kelse, 2019 jyly – 48 myńnan asqan. Al Qazaqstannan 2018 jyly 28 myń, 2019 jyly – 29 myń azamat Ázerbaijanǵa barǵan. Al ótken jyly pandemiiaǵa bailanysty, kelip-ketetin azamattar sany 5 myńǵa deiin azaiǵan.
«Búginde Ishki ister ministrligi kóshi-qon boiynsha 23 halyqaralyq kelisimge qol qoidy. Halyqaralyq deńgeide taǵy 8 kelisim ázirlenýde. Osy kelisimder nátijesinde zańsyz kóshi-qon boiynsha aqparat almasý, adamdardy basqa elderge qaitarý, sheteldikterdiń Qazaqstanda bolý merzimi, qos azamattyqqa jol bermeý máseleleri sheshildi», - deidi E. Turǵymbaev.
