Resei jurty qazaqstandyqtardyń jetistikterin qýanyshpen qabyldaidy. Resei Federatsiiasy Memlekettik Dýma tóraǵasynyń birinshi orynbasary Aleksandr Jýkov QR Táýelsizdiginiń 30 jyldyǵyna arnalǵan ǵylymi-praktikalyq konferentsiiada osyndai pikir bildirdi, dep habarlaidy QazAqparat.
«30 jyl degen - salmaqty beles. Júrip ótken joldy qaita bir salmaqtap, qorytyndy shyǵaratyn kezeń dese de bolady. Resei Federatsiiasy Qazaqstan aýmaǵynda jańa memlekettiń qalai qurylyp jatqanyn baqylap otyrdy. Halyqtyń birligi men uiymshyldyǵynyń arqasynda, el basshylyǵynyń danalyǵy men kóregendeginiń arqasynda tarihi ólshemdegi qysqa merzim ishinde Qazaqstan egemendigi men táýelsizdigin alyp, áleýmettik-saiasi turaqtylyqqa qol jetkize aldy. Ekonomikasyn turaqtandyryp qana qoimai, halyqaralyq qaýymdastyqtyń bedeldi, qurmetti múshesine ainaldy. Biz qazaqstandyq dostarymyzdyń jetistikterin qýanyshpen qabyldaimyz. Qazaqstanmen odaqtas qatynasymyzdy nyǵaitý jáne damytý, strategiialyq áriptestik pen integratsiialyq bailanysty tereńdetý baǵytyn berik ustanamyz. Nur-Sultannyń da osy baǵytpen jyljyp kele jatqanyn kórip otyrmyz», - degen reseilik sheneýnik eki eldiń arasyndaǵy yntymaq koronavirýs pandemiiasyn eńserýde mańyzdy rólge ie bolǵanyn atady.
«Sekseninshi jyldardyń sońynda, toqsanynshy jyldardyń basynda burynǵy KSRO quramyndaǵy elderdiń báriniń ekonomikasy tyryǵyqqa tirelip, bailanystar túgel kúiregen edi. Nazarbaevtyń beibitshilikti tý etken jáne qorshaǵan ortany qorǵaýǵa baǵyttalǵan birqatar bastamasy Qazaqstanǵa halyqaralyq arenada joǵary bedel ákeldi. Búginde tolyq senimmen aitýǵa bolady, Qazaqstannyń memlekettiligi ornyqty. Biz Qazaqstan basshylyǵy kópvektorly syrtqy saiasat ustanatynyn kórip otyrmyz. Beibitshilik pen kelisimdi saqtaýǵa baǵyttalǵan saiasatynyń arqasynda álem qaýymdastyǵynyń tolyqqandy, bastamashyl múshesine ainaldy», - dedi Aleksandr Jýkov.
