Qazaqstan mektepterinde pedagog-assistent qyzmeti engizildi. Mundai mamandar erekshe bilim berý qajettilikteri bar oqýshylardy oqytýda, iaǵni inkliýzivti bilim berýde suranysqa ie. Olar balalardyń mektepke tez úirenip ketýine kómektesedi.
Bul týraly Bilim jáne ǵylym mnistrliginiń baspacóz qyzmeti habarlady.
Bilim jáne ǵylym ministri Ashat Aimaǵambetovtiń tapsyrmasy boiynsha elimizdiń barlyq óńirinde 700-ge jýyq pedagog-assistent jumysqa kiristi.
Aita keteiik, QR BǴM-men erekshe bilim berý qajettilikteri bar balalardy oqytý úshin qolaily jaǵdai jasaý barysynda jumys atqarylyp jatyr.
«Bul muǵalimdi almastyrý degen sóz emes. Pedagog-assistentterdiń aldynda pedagogika men psihologiia toǵysynda erekshe maqsat-mindetter qoiylǵan. Atap aitsaq, balalardy baǵyttaý, olardyń oqý protsesine beiimdelýlerine kómektesý. Áńgime erekshe qajettilikteri bar balalar týraly bolǵandyqtan, pedagog-assistent tehnikalyq qoldaý da kórsete alady. Máselen, eger bala óz betinshe qozǵala almasa. Nemese eger balaǵa defektologtyń kómegi qajet bolsa, pedagogikalyq qoldaý qajet. Biz bul jumysta belsendilik tanytyp júrgen úkimettik emes uiymdarǵa rizashylyǵymyzdy bildiremiz», - dedi QR BǴM Mektepke deiingi jáne orta bilim komitetiniń tóraiymy Gúlmira Kárimova.
Budan basqa, pedagog-assistent erekshe bilim berý qajettiligi bar balalarǵa arnalǵan jeke bilim berý baǵdarlamalaryn ázirleýge qatysady. Qajet bolǵan jaǵdaida oqý baǵdarlamalary bilim alýshylardyń qajettilikterine beiimdeledi. Olar ótken materialdy igerýge ǵana emes, sonymen qatar erekshe qajettilikteri bar balanyń daǵdylaryn damytý dinamikasyn baqylaýǵa kómektesedi. Sonymen qatar erekshe bilim berý qajettilikteri bar balalardyń qaýipsizdigi men densaýlyǵyn saqtaý úshin qajetti jaǵdailardyń saqtalýyn qadaǵalaidy.
«Ministrlik pedagog-assistentterdi basqa da bilim berý uiymdaryna qosý, sondai-aq olardyń jumys júktemesin anyqtaý boiynsha jumys júrgizip jatyr»,-delingen QR BǴM baspasóz qyzmetiniń habarlamasynda.
