5 qazanda Astana qalasynda «Qazaqstan máslihattary depýtattarynyń birlestigi» Respýblikalyq qoǵamdyq birlestiginiń otyrysy ótti.
Atalǵan jiynǵa Nur-Sultan, Almaty, Shymkent qalalary men oblystar máslihattarynyń hatshylary qatysty. Jiyndy «Qazaqstan máslihattary depýtattarynyń birlestigi» respýblikalyq qoǵamdyq birlestiginiń tóraǵasy Tóleýbek Tóleýuly Muqashev júrgizip otyrdy.
Jiynda jýyrda elimizde ótetin mańyzdy oqiǵa – Qazaqstan Respýblikasy Prezidenttigine «Qazaqstan máslihattary depýtattarynyń birlestigi» Respýblikalyq qoǵamdyq birlestiginiń atynan usynylatyn kandidatty aiqyndaý, Jalpyhalyqtyq referendýmnan keiingi Qazaqstannyń jańa saiasi arnaǵa túsýiniń tarihi sátinde júzege asyrylǵaly otyrǵan ózgeristerdi talqylaý jáne pikir almasý, usynys bildirý syndy máseleler qaraldy.
Ózderińizge belgili, Qazaqstan Respýblikasynyń Prezidenttigine kandidattardy saiasi partiialar men respýblikalyq qoǵamdyq birlestikter usyna alady. Osy oraida, «Qazaqstan máslihattary depýtattarynyń birlestigi» respýblikalyq qoǵamdyq birlestigi tóraǵasynyń orynbasary – Túrkistan oblystyq máslihatynyń hatshysy Qairat Rahymuly Balabiev respýblikalyq qoǵamdyq birlestiktiń atynan Qazaqstan Respýblikasy Prezidenttigine kandidat retinde Qasym-Jomart Kemeluly Toqaevty usyndy. Ol óz sózinde: «Prezidentimiz Qasym-Jomart Kemeluly Toqaev asa salmaqty saiasatker, biik parasattyń iesi, tereń bilimdi diplomat, kemel basshy, tek elimizge ǵana emes, búkil álemge belgili iri tulǵa, saiasat sahnasynda shyńdalǵan, Táýelsizdigimizdi nyǵaitýǵa orasan zor úles qosqan memleket qairatkeri.
Búginde Prezidentimiz asa kúrdeli geosaiasi jaǵdaida jańa Qazaqstannyń negizin qalap, onyń kóshin bastap keledi. Shyndyǵynda, Ádiletti Qazaqstan qurý jolynda elimizde aýqymdy reformalar qolǵa alynyp, saiasi mádeniettiń qalyptasa bastaýy barshamyzdy qýantady.
Sondyqtan, Qasym-Jomart Kemeluly Toqaevtyń kandidatýrasyn qoldaimyz jáne Qazaqstanymyzdyń kóshin bastaýǵa laiyqty tulǵa dep bilemiz. Onyń qazaqstandyqtardy sara joldan adastyrmai, biikterge bastai beretinine bek senimdimin» - dedi.
Óz kezeginde, jiynǵa qatysýshylar Qasym-Jomart Kemeluly Toqaevty Qazaqstan Respýblikasy Prezidenttigine kandidat retinde qyzý qoldap, biraýyzdan usyndy.
