Indoneziiada ótip jatqan Aziia oiyndarynda qazaqstandyq sportshylar el qorjynyna toǵyzynshy altyn medaldy saldy, dep habarlaidy "Ult aqparat" QR Ulttyq olimpiada komitetine silteme jasap.
Búgin, 30 tamyz kúni (saǵat 07.30-da) Djakartada kanoe men baidarkada eskek esýden finaldyq kezeńder bastaldy. 500 metrge jarysta Qazaqstan komandasy máre syzyǵyn birinshi bolyp kesip ótip, «altynǵa» qol jetkizdi.
Bul synda el namysyn Ilia Golendov, Sergei Tokarnitskii, Aleksei Dergýnov, Evgenii Alekseev qorǵaǵan bolatyn. Sportshylarymyzdyń ýaqyt kórsetkishi - 1.24.203.
Kúmis júlde - Ońtústik Koreia (1.25.313), qola júlde Iran (1.26.939) quramasynyń enshisinde.
Qazaqstan quramasy úshin bul Aziia oiyndaryndaǵy 52-inshi medal, onyń 9 - altyn, 9 - kúmis jáne 34 - qola.
Kósh basynda jarystyń alǵashqy kúninen beri Qytai quramasy keledi. 29 tamyzdaǵy kórsetkish boiynsha olardyń enshisinde 102 altyn, 67 kúmis, 50 qola (219) medal bar. Ekinshi orynǵa 52 altyn, 47 kúmis, 63 qola (162) medalmen ázirge japoniialyqtar ornalasyp otyr. Úshinshi orynda 37 altyn, 42 kúmis, 50 qola (129) medalmen - Ońtústik Koreia.
Aita keteiik, 30 tamyz kúni qazaqstandyqtar sporttyń 9 túrinen baq synaidy.
