QR Densaýlyq saqtaý ministri Aleksei Tsoi The New York Times basylymynda jariialanǵan «sońǵy eki aptada Qazaqstan koronavirýs infektsiiasynyń taralýy boiynsha kósh basyna shyqty» degen derekke qatysty pikir bildirdi, dep habarlaidy QazAqparat.
«Iá, mundai monitoringti túrli uiymdar júrgizedi. Ózim de tanystarymnan Qazaqstan qyzyl tańbamen belgilenip, «elimizde ósim joǵary» delingen shamamen 100 sýret aldym. Muqiiat oqysańyzdar, eń aldymen aǵylshyn tilinde jariialanǵan bul aqparatta sońǵy 2 aptadaǵy ósim jaiynda aitylǵan. Ózderińiz bilesizder, biz qazirgi ýaqytta simptomy bar jáne simptomsyz naýqastardy qosyp, bárin birge sanaityn boldyq. Óitkeni, simptomsyz ekendigine qaramastan ol patsient virýs taratýshy sanalady jáne olar airyqsha nazar aýdarýdy qajet etedi. Sondyqtan atalǵan ádisti ózgertýdiń nátijesinde virýs juqtyrǵan patsientterdiń sany statistikaǵa salǵanda tsifrlyq turǵyda ózgeriske ushyrady», - dedi ministr Ortalyq kommýnikatsiialar qyzmetindegi brifing barysynda.
Onyń atap ótýinshe, qazirgi ýaqytta elimizde virýs juqtyrǵandar sany kúndelikti 1,5 myń jaǵdaidy qurap, turaqty bolyp tur. Iaǵni, sońǵy eki aptanyń ishinde elimizde indet juqtyrýshylar sanynyń kúrt artyp ketýi tirkelgen joq.
«Bizde mundai patsientterdiń birqalypty, birtindep anyqtalýy tirkelip otyr. Biz simptomy bar jáne simptomsyz patsientterdi birge kórsetkennen keiin aldaǵy 1-2 aptadan keiin statistikalyq derekter túzeledi», - dedi Densaýlyq saqtaý ministri.
