Týnistiń Hammamet qalasynda ótken Dúniejúzilik telekommýnikatsiia jáne aqparattyq-kommýnikatsiialyq tehnologiialar simpoziýmynda Halyqaralyq elektrobailanys odaǵynyń (HEO) 2017 jylǵy «Aqparattyq qoǵamdy ólsheý» týraly esebi usynyldy, dep habarlaidy "Ult aqparat" zerde.gov.kz saityna silteme jasap.
Atalǵan esepke sáikes, Qazaqstan aqparattyq-kommýnikatsiialyq tehnologiialardy (AKT) damytý indeksi boiynsha álemniń 176 eliniń ishinde 52-shi orynda tur.
Reitingtiń alǵashqy úsh ornyna - Islandiia (8,98), Koreia (8,85) jáne Shveitsariia (8,74) ornalastyrylǵan.
Bul rette, Qazaqstan TMD aýmaǵy boiynsha Belarýs (32-oryn) pen Reseiden (45-shi) keiingi úshinshi orynda.
HEO sarapshylarynyń málimeti boiynsha, Qazaqstanda uialy bailanystyń infraqurylymy joǵary damyǵan. Sondai-aq elimizde TMD-nyń ózge elderimen salystyrǵanda mobildik keń jolaqty bailanystyń ený deńgeii eń joǵary.
Sonymen qatar Qazaqstan kompiýterlerge qoljetimdilik pen Internetti paidalaný salasynda aimaqtyq kóshbasshy bolyp tabylady.
Aita keteiik, atalǵan indeks 2009 jyldan beri jyl saiyn jariialanyp keledi. AKT damýynyń indeksi (IDI) úsh negizgi komponentten turady: AKT-ǵa qoljetimdilik, AKT-ny paidalaný jáne AKT daǵdylary.
