Qazaqstan halqynyń sany 2018 jyldyń 1 jeltoqsanynda 2017 jylǵy kórsetkishten 238,9 myń nemese 1,3% ósip, 18 mln 376,2 myńdy qurady, dep habarlaidy QazAqparat.
Atap aitqanda, esepti kezeńde qala turǵyndarynyń jalpy sany 10 mln 626,2 myńǵa jetip, jalpy halyq sanynyń 57,8%-yn qurady. Al aýyl turǵyndary 7 mln 750 myń nemese 42,2% boldy.
Byltyr qańtar-qarasha ailarynda respýblikada 1 jasqa tolmaǵan 2882 sábi shetinegen (2017 jyldyń qańtar-qarasha ailarynda - 2896). 2018 jyldyń on bir aiynda ár 1000 sábidiń 7,86-sy shetinegen.
Sábiler óliminiń negizgi sebebi perinataldyq kezeńde týyndaǵan jaǵdailar bolǵan. Sonyń saldarynan byltyr qańtar-qarasha ailarynda 1474 sábi (jalpy kórsetkishtiń 51,1%-y) shetinegen.
2018 jyldyń qańtar-qarasha ailarynda Qazaqstanǵa kóship kelgenderdiń sany aldyńǵy jylǵy kórsetkishpen salystyrǵanda 20,5% azaiyp, ketkender sany 11,9% artqan. Elge kelýshilerdiń 78,6%-y TMD elderinen kelse, ketýshilerdiń 90,3%-y Dostastyq elderine ketken.
El ishinde kóship-qonýshylardyń sany 12,2% azaidy. Óńiraralyq kóshi-qonnyń oń saldosy Shymkent (38 074 adam), Almaty (31 738) jáne Astana (17 617) qalalarynyń úlesine týra keledi.
