«Qazaqstan halqyna» qoryn júzege asyrý tetikterin pysyqtaý úshin Úkimet janynan jumys toby qurylmaq. Bul týraly búgin Úkimet otyrysynda Densaýlyq saqtaý ministri Ajar Ǵiniiat aitty, dep habarlaidy "QazAqparat" HAA.

«Memleket basshysynyń «Qazaqstan halqyna» qoǵamdyq áleýmettik qoryn qurý jónindegi tapsyrmasy boiynsha: qoldanystaǵy zańnamaǵa sáikes qoǵamdyq qor dep jeke tulǵalar nemese zańdy tulǵalar - qoǵamdyq birlestikter qurǵan qor túsiniledi. Qor qyzmetiniń salasy áleýmettik jáne mádeni qyzmettiń ártúrli aspektilerin (densaýlyq saqtaý, bilim berý, sport, mádeniet, áleýmettik infraqurylym, bolǵan joiqyn – qiratý saldaryn qalpyna keltirý jáne qaza tapqan áskeri qyzmetshilerdiń otbasyn qoldaýy) qamtityn bolady. Qordy qarjylandyrý jeke jáne memlekettik kózderden júzege asyrylady. Halyqaralyq qaiyrymdylyq uiymdarynyń kómegin, lotereia qyzmeti operatorynyń, stavkalardy esepke alý ortalyǵynyń jáne basqa monopolisterdiń mindetti aýdarymdaryn qorǵa turaqty tartý josparlanýda. Osyǵan bailanysty qordyń quryltaishysy retinde áreket etetin qoǵamdyq birlestikti aiqyndaý, sondai-aq iske asyrý tetikterin ázirleý úshin azamattyq qoǵam ókilderiniń qatysýymen Úkimet janynan jumys tobyn qurý usynylady», - dedi ministr.

Onyń atap ótýinshe, Densaýlyq saqtaý ministrligi «Qazaqstan halqyna» qoǵamdyq áleýmettik qorynyń qarajatynan orfandyq aýrýlary bar balalardy emdeýge arnalǵan boljamdy shyǵyndardyń esebi men dárilik zattardyń tizbesi boiynsha usynystar engizedi.

«Balalardyń densaýlyǵyn saqtaý salasynda sirek (orfandyq) jáne aýyr aýrýlary bar balalardy dári-dármekpen qamtamasyz etý neǵurlym ózekti bolyp tabylady. Álemdegi eshbir el óte joǵary shyǵyndardy eskere otyryp, barlyq orfandyq aýrýlardy tolyq qarjylandyrmaidy. Sondyqtan da, Qordy qurý orfandyq aýrýlarmen aýyratyn naýqastar úshin qymbat turatyn meditsinalyq qyzmetter men dárilik zattardyń qoljetimdiligin arttyrýǵa múmkindik beredi. Jumys jalǵasýda», - dedi Ajar Ǵiniiat.