Qazaqstan halqy Assambleiasynyń (QHA) keńesi Ýkrainanyń Qazaqstandaǵy elshisi Petr Vrýblevskiidiń málimdemesin aiyptady, - dep habarlaidy "Ult aqparat".
"Biz, Qazaqstan halqy Assambleiasynyń músheleri, Qazaqstan Respýblikasyndaǵy Ýkraina elshisi Petr Vrýblevskii myrzanyń qazaqstandyq blogerlerdiń birine bergen suhbatynda aitqan sózderin qatań aiyptaimyz jáne ondai saryndaǵy málimdelerge jol berýge bolmaidy dep sanaimyz.
Beibitshilik pen birlik - bizdiń memlekettik saiasattyń jáne qoǵamdyq birigýdiń basty qaǵidalary. Sondyqtan mundai pikirdi kim aitsa da, bizdiń qarsylyǵymyzǵa ushyraidy", - delingen habarlamada.
QHA músheleri "diplomatiia - óshpendilik pen arazdyqty qozdyrý úshin emes, beibitshilik pen yntymaqtastyq idealdaryna qyzmet etýi tiis" ekenin naqtylady.
"Qazaqstannyń birtutas kópetnosty halqy úshin dostyq, ózara kómek jáne beibitshilik qaǵidalary - myzǵymaityn ustanym. Olar bizge Táýelsizdigimizdiń qalyptasýynyń eń qiyn jyldarynda da etnosaralyq qaqtyǵystardyń aldyn alyp, elimiz ben halqymyzdyń tutastyǵyn saqtaýǵa kómektesti.
Óshpendilikti qozdyratyn kez-kelgen pikir, etnostyq jek kórýshilik pen onyń qandai bolmasyn kórinisterin nasihattaý - biz úshin jat uǵym", - dep tolyqtyrdy olar.
Sondai-aq, Assambleia barlyq qazaqstandyqty dushpandyq pen zulymdyqty nasihattaityn arandatýlarǵa ermei, urpaqtyń búgini men bolashaǵy úshin eldegi beibitshilik pen halyq birligin saqtaýǵa jáne nyǵaitýǵa shaqyrdy.
