Qazaqstan qurǵaq júk tasityn paromdardyń sanyn 10-ǵa jetkizýdi josparlap otyr, dep habarlaidy QazAqparat.
Bul týraly Ortalyq kommýnikatsiialar qyzmetinde ótken brifingide QR Indýstriia jáne infraqurylymdyq damý ministrligi Kólik komiteti tóraǵasynyń mindetin atqarýshysy Qasym Tilepov aitty.
«Qazirgi tańda Aqtaý portyndaǵy bizdiń infraqurylymnyń ótkizý qabileti 21 mln tonnadai bolady. Bul baǵytta júktiń kez kelgen túrin tasymaldai alamyz. Sondai-aq, bizdiń ózimizdiń saýda flotymyz bar. Naqtyraq aitsaq, 4 qurǵaq júk tieýishimiz bar. Qazir bul júk tieýishter Kaspii teńizinde jumys istep júr», - degen komitet ókili jyl aiaǵyna deiin «Qazteńizkólikfloty» ulttyq teńiz tasymaldaýshysy taǵy 2 konteiner tasymaldaýshy satyp alatynyn atap ótti.
Onyń sózine qaraǵanda, Qazir Kaspiide qurǵaq júk tasymaldaý isinde Ázerbaijannyń monopoliiasy ornaǵan.
«Jalpy ózimizdiń parom flotymyzdy salsaq degen nietimiz bar. Uzaq merzimdi keleshekte konteiner tasymaldaýshy paromdardyń sanyn 10-ǵa deiin jetkizsek degen josparymyz bar. Qazir Kaspiide Ázerbaijan parohodtary monopoliia ornatqan», - dedi Qasym Tilepov.
