Bir jarym ai ishinde Qarýly Kúshterdiń áskeri bólimderi men mekemelerinen kezeń-kezeńimen 6 500-den astam sarbaz úiine qaityp oraldy.
«Biz árbir sarbazymyzdy maqtan tutamyz. Keshegi uiań bozbala jyl boiy ótken qarqyndy jaýyngerlik daiarlyqta, teoriialyq jáne praktikalyq sabaqtarda naǵyz er jigit, óz eliniń qorǵaýshysy bolyp shyńdalyp shyǵady. Osy ýaqyt ishinde olar tájiribe jinaqtap, kásibi daǵdyǵa ie bolady, jańa mamandyqty meńgeredi», – dep atap ótti Desanttyq-shabýyldaý áskerleriniń qolbasshysy general-maior Mereke Kúshikbaev.
Onyń aitýynsha, sarbazdar kelisimshart boiynsha qyzmetin jalǵastyrý úshin áskeri bólimge qaityp oralsa nemese áskeri oqý ornyna oqýǵa tússe, komandirler úshin bul úlken maqtanysh sezimin týdyrady.
«Olar armiiada turaqty jalaqy, kepildi turǵyn úi alýmen qatar, laiyqty meditsinalyq qyzmetpen qamtamasyz etiledi jáne basqa da jeńildikterge ie bolady, iaǵni bolashaǵyna degen senimi zor bolady», – dedi qolbasshy.
Sanitariialyq-epidemiologiialyq jáne karantindik shekteýlerge bailanysty shyǵaryp salý saltanaty ótkizilgen joq, ata-analary men týysqandary shaqyrylǵan joq, áitse de dástúrli áskeri joralǵylar uiymdastyrylyp ótkizildi. Merzimdi qyzmet áskeri qyzmetshileri áskeri bólimniń jaýyngerlik týymen qoshtasyp, áskeri orkestrdiń áýenimen alańnan saltanatty marshpen júrip ótti.
«Otan aldyndaǵy óz boryshyn abyroimen atqarǵan 2020 jylǵy kóktemde áskerge shaqyrylǵan sarbazdar atynan osy ýaqyt ishinde bizge árqashan qoldaý kórsetip, qiyn kezde demeý bolǵan áskeri bólimniń qolbasshylyǵyna, barlyq ofitserleri men serjanttaryna rizashylyǵymdy bildiremin. Biz Halyq Qaharmany Qasym Qaisenov atyndaǵy brigadada qyzmet ótkergenimizdi maqtan tutamyz.Zapasqa shyqsaq ta bizdiń basty uranymyz «Mindet! Abyroi! Erlik!» bolyp qala bermek», – dep zapasqa shyǵarylǵan sarbazdar atynan sóz sóilegen qatardaǵy jaýynger Nurdáýlet Ramazanov mehanikalandyrylǵan brigada qolbasshylyǵyna alǵys aitty.
Qyzmet ótkergen kezeńnen estelik retinde sarbazdarǵa fotoalbomdar, al erekshe kózge túsken áskeri qyzmetshilerdiń ata-anasyna alǵyshat tabys etildi.
Zapasqa shyǵarylǵan áskeri qyzmetshiler úilerine temirjol kóligimen jiberiledi. Turǵylyqty jerine kelgennen keiin olar áskeri oqytylǵan rezerv retinde jergilikti áskeri basqarý organdaryna áskeri esepke qoiylatyn bolady.
