Islam yntymaqtastyq uiymy Atqarýshy komitetiniń IYU-ǵa múshe memleketterdiń Syrtqy ister ministrleri deńgeiinde beinekonferentsiia formatynda tótenshe ashyq otyrysy ótti, dep habarlaidy "Ult aqparat" QR SIM baspasóz qyzmetine silteme jasap.
Qatysýshylar Palestina aýmaǵynyń bir bóligine, onyń ishinde Iordan ózeniniń batys jaǵalaýyna Izrail egemendigin taratý josparyna qatysty ujymdyq ustanymdy talqylap, tujyrymdady.
Qazaqstandyq delegatsiiany QR Syrtqy ister ministriniń birinshi orynbasary Shahrat Nuryshev basqardy. Óz sózinde ol elimiz BUU Qaýipsizdik keńesiniń, 2002 jylǵy Arab beibit bastamasynyń tiisti qararlaryna sáikes keletin Halyqaralyq quqyq negizinde Palestina-Izrail qaqtyǵysyn retteýdi jaqtaitynyn jáne 1967 jylǵy shekara boiynsha Shyǵys Ierýsalimdegi astanasy bar Palestina Memleketiniń qurylýyn qoldaitynyn atap ótti.
Qazaqstan qaqtyǵysýshy taraptardy birjaqty qadamdardan bas tartýǵa jáne «eki halyq úshin eki memleket» qaǵidaty negizinde aldyn ala shart jasamai kelissóz protsesin qaita bastaýǵa shaqyrady.
Sh. Nuryshev, sondai-aq zorlyq-zombylyqtan bas tartýǵa negizdelgen múddeli taraptardyń syndarly dialogy olardyń arasyndaǵy qaishylyqtardy eńserýdiń jalǵyz qolaily joly bolyp tabylatynyn atap ótti.
Otyrys Saýd Arabiiasy men Palestinanyń syrtqy saiasi vedomstvolarymen IYU Bas Hatshylyǵyn úilestirýimen uiymdastyryldy. Is-sharaǵa 39 astam eldiń delegatsiialary, onyń ishinde 24 ministrler deńgeiinde qatysty.
IYU 2008 jylǵy 14 naýryzdaǵy Jarǵysynyń 12-babyna sáikes Atqarýshy komitetke osy, aldyńǵy jáne bolashaq Islam sammitteriniń (Túrkiia, Saýd Arabiiasy, Gambiia) jáne syrtqy ister ministrleri keńesi sessiialarynyń (Bangladesh, Birikken Arab Ámirlikteri, Niger), sondai-aq Bas hatshylyqtyń shtab-páteri ornalasqan elder (Saýd Arabiiasy) jáne atqaratyn qyzmetine bailanysty Bas hatshy kiredi. Atqarýshy komitettiń ashyq otyrystary barlyq múshe memleketterdiń qatysýymen ótkiziledi.
Qazaqstan IYU-nyń 1995 jyldan bastap tolyq quqyly múshesi. Uiymnyń quramyna 56 musylman memleketi kiredi.
