Qazaqstannyń aviatsiialyq ákimshiligi Irlandiianyń aviatsiialyq bilikterimen sol elde tirkelgen jáne qurǵaq lizing sharttary boiynsha qazaqstandyq áýe kompaniialary paidalanatyn áýe kemelerin baqylaý jáne qadaǵalaý jónindegi mindetterdi berý týraly kelisimge qol qoidy. Bul týraly "Ult aqparat" QR Indýstriia jáne infraqurylymdyq damý ministrliginiń saityna silteme jasap habarlaidy.
Qol qoiý rásimine QR Indýstriia jáne infraqurylymdyq damý ministri Beibit Atamqulov, Irlandiia aviatsiialyq basqarmasynyń direktory Diarmýd o'Kongeil, QR IIDM Azamattyq aviatsiia komitetiniń tóraǵasy Talǵat Lastaev, AAK Bas direktory Piter Griffits qatysty.
Búgingi tańda «Eir Astana» ulttyq tasymaldaýshysy Arýbada tirkelgen óz ushaqtaryn paidalanady. Olardy litsenziialaý, ushý jaramdylyǵy jáne ushý quramyn sertifikattaý negizinen osy elde júzege asyrylady. Mundai sheshim áýe kompaniiasynyń Eýropaǵa mańyzdy reistermen ushýy úshin «qara tizim» kezeńinde qajet boldy. Ministrlik 2024 jyly Qazaqstannyń tiziliminde zamanaýi áýe kemelerin tirkeýge múmkindik berý baǵytynda jumys istep jatyr.
Osy maqsatta aldymen áýe flotyn eki kezeńdi protsess aiasynda Irlandiia tizilimine aýystyrýdy bastaý kerek. Ol shamamen eki jylǵa sozylady. Shara EASA (ushý qaýipsizdigi jónindegi Eýropalyq agenttik) normativtik standarttaryna sáikestigi úshin qajet jaǵdailar jasaýǵa múmkindik beredi.
Qol qoiylǵan kelisim sharttary boiynsha «Eir Astana» kompaniialar tobynyń barlyq áýe kemeleri bir jyl ishinde Irlandiia tizilimine aýystyrylady.
Taraptar qazaqstandyq áýe kompaniialary paidalanatyn áýe kemeleriniń ushý qaýipsizdigin qadaǵalaýdy qamtamasyz etý máseleleri boiynsha tyǵyz yntymaqtasa jumys isteidi. Kelisim sharttarynda, sondai-aq, halyqaralyq aviatsiialyq uiymdar júrgizetin aýditten ótýge kómek berý kózdelgen.
Qol jetkizilgen ýaǵdalastyqtar álemdik aviatsiialyq qoǵamdastyqqa Qazaqstannyń ushý qaýipsizdigin qamtamasyz etý deńgeiin arttyrý boiynsha jumysta qol jetkizgen jetistikterin kórsetedi jáne otandyq aviatsiia úshin «qara tizim» máselesi budan bylai ózekti emestigin bildiredi.
