Ortalyq kommýnikatsiialar qyzmetinde ótken brifingide QR Kólik komiteti tóraǵasynyń mindetin atqarýshysy Qasym Tilepov júk tasymalyndaǵy Iran baǵytynyń áleýetine toqtaldy, dep habarlaidy QazAqparat.
«Iran baǵytynyń áleýetin qazir 19 paiyz kóleminde ǵana paidalanyp otyrmyz. Sondyqtan bul marshrýtty qoldanýda úlken áleýet bar. Bul bizdiń Parsy shyǵanaǵyna shyǵýymyzǵa múmkindik beredi. Parsy shyǵanaǵy arqyly Úndistanǵa, odan ári ashyq teńiz joldarymen Eýropa naryǵyna ótýge bolady. Onyń ústine ótken aida ǵana Memleket basshysy Iranda boldy. Sol kezde konteiner tasityn poiyz demonstratsiialyq sapar jasady. Qazaqstan. Túrikmenstan, Iran aýmaqtaryn basyp ótken bul poiyz Túrkiiaǵa tikelei shyqty. Bul da áleýeti jaqsy mashrýttardyń biri», - dedi vedomstvo basshysy.
Sondai-aq, ol Qazaqstannyń Ortalyq Aziiadaǵy eń negizgi kólik-logistikalyq habqa ainalatyn múmkindigi bar ekenin eske saldy.
«Bulardyń bárindegi negizgi josparymyz – Qazaqstandy Ortalyq Aziianyń basty kólik-logistikalyq habyna ainaldyrý. Ol úshin búkil alǵysharttar bar. Kólik infraqurylymynyń qańqasy qurylǵan. Qazir sol áleýetti kúsheitilgen rejimde keńeitý kerek», - dedi Qasym Tilepov.
