Foto: ashyq derekkóz
Qazaqstan Eýropalyq Odaqpen kelissózder nátijesinde kómirdi Resei arqyly Eýropa naryǵyna qaita tasymaldaýǵa múmkindik aldy, dep habarlaidy Ult.kz.
Eske salaiyq, 2025 jyldyń aqpanynda EO-nyń 16-paket sanktsiiasy aiasynda Resei porttarymen kez kelgen kelisimge tyiym salynǵan bolatyn. Bul Qazaqstannyń kómir eksportyna tikelei qaýip tóndirgen edi, sebebi Ýst-Lýga porty elimizdiń Eýropaǵa kómir jetkizýindegi negizgi tranzittik núkte retinde paidalanylyp keldi.
Qazaqstan Respýblikasy Saýda jáne integratsiia ministrligi, Syrtqy ister ministrligi jáne EO janyndaǵy Turaqty ókildigi birlesip, Eýropalyq tarappen birneshe deńgeidegi konsýltatsiialar júrgizdi. Nátijesinde, EO-nyń 18-paket sanktsiiasy aiasynda qazaqstandyq kómir úshin keibir reseilik porttar arqyly tranzittik tasymalǵa ruqsat berildi.
Bul ruqsat kelesi sharttarmen ǵana kúshinde:
-
kómir tek Qazaqstanda óndirilgen bolýy tiis;
-
kómirge menshik quqyǵy sanktsiia salynǵan elderdiń rezidentterine tiesili bolmaýy kerek;
-
reseilik porttar tek tranzit, tieý nemese jóneltý núktesi retinde qoldanylady — onda kómirdi satý nemese óndirýge bolmaidy.
Qazaqstan kómiriniń EO-ǵa eksporty boiynsha kórsetkishter:
-
2022 j.: 4,4 mln tonna | $419,2 mln
-
2023 j.: 6,1 mln tonna | $382 mln
-
2024 j.: 5,2 mln tonna | $312,5 mln
-
2025 j. qańtar–mamyr: 1,6 mln tonna | $82,9 mln
Eksporttyń ýaqytsha tómendeýine qaramastan, qabyldanǵan sheshim Qazaqstan kómirin Eýropaǵa jetkizýdi qalpyna keltirýge jáne logistikalyq turaqtylyqty nyǵaitýǵa jol ashady.
«Qazaqstan Respýblikasynyń Saýda jáne integratsiia ministrligi elimizdiń saýda múddelerin qorǵaý jáne ulttyq eksportty qoldaý jónindegi, sondai-aq negizgi áriptestermen ekonomikalyq bailanystardy odan ári damytý boiynsha jumystardy jalǵastyrady», - delingen habarlamada.
