Elshi Ermek Kósherbaev bastaǵan Qazaqstannyń Reseidegi Elshiliginiń delegatsiiasy Máskeýdiń Zelenograd ákimshilik aýdanyndaǵy Baýyrjan Momyshuly atyndaǵy №1912 orta mektepte boldy, dep habarlaidy QR SIM baspasóz qyzmeti.
Eske alý rásimi kezinde diplomattar mektep aýlasynda ornatylǵan batyrdyń biýstine gúl shoqtaryn qoiyp, B.Momyshuly men aty ańyzǵa ainalǵan Panfilov diviziiasyna arnalǵan mektep murajaiynyń kórmesimen tanysty.
Oqytýshylarmen jáne oqýshylarmen kezdesýde E.Kósherbaev qazaq batyrynyń esimin este saqtaǵany úshin rizashylyǵyn bildirip, búgingi beibit ómirge qandai qiyndyqpen kelgenimizdi umytpaýǵa shaqyrdy. Sonymen qatar, jas urpaqty eldiń bostandyǵy men táýelsizdigi úshin janyn qiǵan erlerdiń erligi men adaldyǵy úlgileri boiynsha tárbieleýdiń mańyzdylyǵyn atap ótti.
Óz kezeginde mektep direktory Andrei Kýrsakov qazaqstandyq áriptesterimen soǵys batyrlarynyń esimin máńgi este qaldyrýdaǵy birlesken jumystary týraly aityp berdi. Atap aitqanda, jaqynda Baýyrjan Momyshulynyń 110 jyldyǵyna orai tájiribe jáne materialdar almasý boiynsha onlain-konferentsiia ótti. Sonymen qatar, mektep mýzeiiniń kórmesin tsifrlandyrý jáne jyl sońynda qazaqstandyq mekteptermen telekópir uiymdastyryp, Máskeý úshin bolǵan shaiqastyń 80 jyldyǵyn atap ótý josparlanyp otyr.
8-synyp oqýshysy Evgenii Vorobevtiń aitýynsha, mektep mýzeiine, Momyshulynyń ómiri men qyzmeti týraly seminarlarǵa tek óz oqýshylary ǵana emes, sonymen qatar jaqyn mańdaǵy mektepterdiń oqýshylary da qatysady, al ótken jyldyń qarasha aiynda Batyrdyń shaiqastarynyń baǵyttary boiynsha ekskýrsiia jasaldy. «Men Momyshulynyń jeke basyna tántimin, ol kórnekti áskeri jáne qoǵam qairatkeri boldy. Onyń áigili «Momyshuly spiraly» áskeri taktikasyna tek keńes qolbasshysy Konstantin Rokossovskii ǵana emes, sonymen birge maidandaǵy qarsylas-nemis generaly Erih Gepner de joǵary baǵa berdi», – dedi E.Vorobev.
Máskeý qalasyndaǵy Zelenograd okrýgindegi №1912 mektepke Baýyrjan Momyshulynyń esimi 2010 jyly Jeńistiń 65 jyldyǵy men batyrdyń 100 jyldyǵyn merekeleý aiasynda Qazaqstannyń Reseidegi Elshiliginiń qoldaýhaty boiynsha berildi. Dál osy mektepti tańdaý Kriýkovo kentiniń mańynda 1941 jyly Máskeýdi qorǵaý kezinde qandy shaiqastar bolǵandyǵymen bailanysty, onda quramynda Baýyrjan Momyshuly soǵysqan Panfilov diviziiasynyń jaýyngerleri óshpes erlik jasady. 2010 jyly Qazaqstan Elshiliginiń kómegimen B.Momyshuly atyndaǵy mektep mýzeii quryldy, onyń qola biýsti de osynda ornatyldy.
