Qazaqstan Kásipqoi fýtbol ligasy 2020 jylǵy maýsymnyń qorytyndysy boiynsha Olimpbet-Qazaqstan chempionatynyń úzdikter quramasyn jariialady, dep habarlaidy "Ult aqparat".
Qazaqstan Kásipqoi fýtbol ligasynyń (QKFL) resmi saitynda biylǵy fýtbol maýsymynyń úzdikter quramy jariialandy. Úzdik komanda QKFL seriktesi InStat kompaniiasynyń matchtaryn statistikalyq taldaý negizinde quryldy. Sonymen 2020 jyldyń úzdikter quramasy tómendegidei:
Qaqpashy: Aleksandr Mokin («Tobyl»).
Tájiribeli qaqpashy 13 matchtyń 10-ynda qaqpasyna gol ótkizbegen. Mokin 23 soqqyny qaitardy. Is-qimyl indeksi – 240.
Oń qaptaldaǵy qorǵaýshy: Iliias Ámirseiitov («Qaisar»).
Biylǵy maýsym «Qaisardyń» qorǵaýshysy úshin sátti boldy. Ol qorǵaýshylardyń TOP-5 sanatyna endi. Statistika boiynsha 49 ret dopqa talasta qarsylastarynan basym túsken.
Ortalyq qorǵaýshylar: Rade Dýgalich jáne Nuraly Álip («Qairat»).
Dýgalich–Álip juby chempionatta eń tiimdi óner kórsetkenderdiń qatarynda. Oiynshylar bir-birin tolyqtyryp, múmkindiginshe senimdi áreket etti. Rade dopqa talastarda ozyq shyqsa, jas qorǵaýshy Nuraly ár oiynda saýatty qimyldady. Sonymen qatar Nuraly tórt ret gol soqty. Ulttyq quramanyń beldi oiynshysy sanalady.
Sol qaptaldaǵy qorǵaýshy: Ǵafýrjan Súiimbaev («Qairat»).
Súiimbaev qorǵanysta da, shabýylda da ózin kórsete bildi. Chempionatta 7 golǵa múmkindik jasady. Ol maýsym boiy úzdikter quramyna 8 ret kirgen. Is-qimyl indeksi – 265.
Tirek jartylai qorǵaýshy: Djaba Kankava («Tobyl»).
«Tobyldyń» grýziialyq fýtbolshysy Djaba Kankava kezekti maýsymda sátti oinady. Djaba ózi qatysqan jekpe-jektiń 62% -ynda jeńdi jáne osy kórsetkish boiynsha úzdik 3 oiynshynyń qatarynda.
Oń jaq jartylai qorǵaýshy: Tigran Barsegian («Astana»).
Armeniialyq oiynshy Barsegian shabýyl shebinde elordalyq komandany alǵa súiredi. Joǵary jeke sheberlik pen tiimdi dribling onyń ainymas serigi boldy. Tigran úsh gol soǵyp, áriptesterine 5 goldyq pas berdi.
Shabýyldaýshy jartylai qorǵaýshy: Ashat Taǵybergen («Qaisar»).
Taǵybergen Qyzylorda klýbynyń shabýyldarynyń negizgi uiymdastyrýshysy ǵana emes, qorǵanysta da jaqsy oinady. Ashat 2020 jyly 4 gol soǵyp, 2 ret assistent atandy. Onyń eki goly tamyz jáne qarasha ailaryndaǵy eń úzdik gol bolyp tanyldy.
Sol jaq jartylai qorǵaýshy: Joao Paýlo («Ordabasy»).
Joao – chempionattyń úzdik oryndaýshylarynyń biri. Shymkenttik klýbtyń shabýylyndaǵy basty róldi osy braziliialyq fýtbolshy oinady. Barlyǵy 12 gol soǵyp, týrnirdiń úzdik bombardiri atandy. Sonymen qatar Paýlo birneshe statistikalyq kórsetkishter boiynsha Ligada úzdik atandy. Is-qimyl indeksi – 248.
Shabýylshylar: Abat Aiymbetov jáne Vagner Lav («Qairat»).
Aiymbetov ekinshi maýsym qatarynan eń nátijeli qazaqstandyq shabýylshy atandy. 20 matchta ol 10 gol soqty. Abat jańa ujymǵa biyl qosylsa da, oiyn shemasynda ózin jaqsy kórsetti.
Vagner Lav Olimpbet-Qazaqstan chempionatynyń naǵyz sánine ainaldy. Juldyzdy braziliialyq jeke sheberligi jaǵynan ligadaǵy eń úzdikterdiń biri boldy. Ol «Qairattyń» 17 nátijeli shabýylyna qatysty. Statistikalyq málimetterge sáikes, Lavtyń qorjynynda 4 gol, 12 nátijeli pas jáne 17 dál soqqy bar. Is-qimyl indeksi – 266.
