Eldegi kómir óndirýshi kompaniialar 4 aidyń ishinde 36,5 mln tonna kómir óndirgen, dep habarlaidy "Ult aqparat".
Bul týraly Indýstriia jáne infraqurylymdyq damý ministri Beibit Atamqulov Úkimet otyrysynda aitty.
«Ótken jylytý maýsymynyń qorytyndysy boiynsha kómirdi tutyný kólemi shamamen 10 mln tonna boldy. Onyń ishinde kommýnaldyq-turmystyq sektorǵa 2,8 mln tonna, halyqqa 7,2 mln tonna baǵyttaldy. Kómirmen qamtamasyz etý kólemi 100% qurady», - degen ministr aldaǵy maýsymǵa qajet otyn mólsherin ákimdikter 1 shildege deiin usynýy qajet ekenin eskertti.
«2020 jyly jospar boiynsha (kómir kontsentratyn eseptemegende) 107,2 mln tonna kómir óndirildi. Eldiń ishki naryǵynda energiia óndirýshi kásiporyndarǵa 58,8 mln tonna kómir tieldi. Bul 2019 jylmen salystyrǵanda 2,6% artyq (57,3 mln. tonna). Ónerkásip kásiporyndaryna 5,6 mln tonna kómir baǵyttaldy. Kommýnaldyq-turmystyq qajettilikterge jáne halyqqa dep 10,6 mln tonna kómir tieldi. Kómir eksporty shamamen 29,3 mln. tonna kómirdi qurady. Jalpy alǵanda, aldaǵy jylý berý maýsymyna daiyndyq jumystary belsendi júrgizilip jatyr. Kómir tapshylyǵy bolmaýy tiis», - dedi Beibit Atamqulov.
