Qazaqstan biyl 67,6 mln tonna munai eksporttaǵan. Bul týraly QR Energetika ministri Maǵzum Myrzaǵaliev ortalyq kommýnikatsiialar qyzmetinde ótken brifingide aitty, dep habarlaidy QazAqparat.
«2021 jyldyń qorytyndysy boiynsha munai óndirý kólemi 85,7 mln tonna boldy. Eksport 67,6 mln tonnaǵa jetti. Munaidy qaita óńdeý kólemi 17,1 mln tonna jáne munai ónimderin óndirý kólemi 13,1 mln tonna boldy», - dedi ministr.
Onyń málimeti boiynsha, táýelsizdik jyldary Qazaqstanda munai óndirý qarqyny ósken.
«Keleshekte munai óndirý budan ári ulǵaiady. Elimizdiń munai óndirýdegi draiverleri – 3 munai-gaz jobasy: Teńiz, Qarashyǵanaq jáne Qashaǵan», - dedi Maǵzum Myrzaǵaliev.
Sondai-aq, ol «Teńiz» jobasynyń keleshegine toqtaldy.
«2021 jyldyń qorytyndysy boiynsha «Teńiz» jobalarynda munai óndirý kólemi 26,5 mln tonna, gaz óndirý kólemi 14,5 mln tonnaǵa teń boldy. Teńiz ken ornynda quny 45,2 mlrd dollar bolatyn «Keleshek» keńeitý jobasy iske asyrylyp jatyr. Bul munai óndirisin jylyna 12 mln tonnaǵa arttyrýǵa múmkindik beredi. Búgingi tańda joba boiynsha jumystardyń jalpy ilgerileýi 87 paiyz boldy. Jobany 2023 jyly aiaqtaý josparlanyp otyr», - dedi vedomstvo basshysy.
