Qazaqstan bilim berýdiń Bolon protsesinen shyqpaidy. Bul týraly Memleket basshysy Qasym-Jomart Toqaev aitty, dep habarlaidy QazAqparat agenttigi.
«Kezinde Bolon júiesine kúmánmen qaraǵan edim. Oǵan qosylǵan kezde Senat tóraǵasy boldym jáne Úkimetke bul iste asyǵystyq tanytýdyń qajeti joq ekendigin eskerttim. Sol ýaqytty oǵan qosylýymyz úlken ulttyq jetistik, tipti mereke retinde kórsetildi. Is júzinde onyń da óte kóp kemshiligi bar jáne olardy baiqaǵan edim. Bul medaldiń eki jaǵy bar. Negizinde Resei Úkimetiniń Bolon júiesinen shyǵýy týraly sheshimin túsinemin. Biraq, onyń saldary da bolatynyn túsiný qajet», - dedi Prezident reseilik jýrnalist Andrei Kondrashovqa bergen suhbatynda.
Memleket basshysy elimizde bilim berý salasyna óte úlken nazar aýdarylyp otyrǵanyn basa aitty.
«Óitkeni, bilimniń róli óte zor. Men reseilik tehnikalyq joǵary oqý oryndarynyń Qazaqstanda filialdaryn ashýyna qatysty bastama kóterdim. Bul protsess bastaldy. Máskeý injenerlik-fizikalyq institýty QazMÝ-de filialyn ashty. Gýbkin atyndaǵy munai jáne gaz ýniversiteti de filialyn ashady. Menińshe, bul protsess jalǵasa beredi. Óitkeni, qazirgi qazaq jastary básekege qabiletti bolýy úshin, eń aldymen, tehnikalyq bilim alýy tiis dep esepteimin. «Bolashaq» baǵdarlamasy arqyly talantty jastardy shetelge jiberý múmkindigi de saqtalyp otyr. Atap aitqanda, olar magistranttar, tipti bakalavriattar da. Biz bakalavr baǵdarlamasyn qysqartyp, álemniń úzdik joǵary oqý oryndaryna baratyn magistranttardyń sanyn arttyramyz», - dedi Toqaev.
