Foto: gov.kz
Qorǵanys ministri Rýslan Jaqsylyqov Qazaqstan UQShU jattyǵýlaryna Belarýske brondy tehnika jóneltti degen qaýesetti joqqa shyǵardy, dep habarlaidy Sputnik Qazaqstan.
"Internette taraǵan Qazaqstan brondy tehnika jiberdi degen aqparattar – feik. Qazirgi tańda búkil tehnika turaqty dislokatsiia pýnkterinde tur, 11 adamnan quralǵan jedel top jiberildi. Tiisinshe, bul - basqarý organdarynyń jumysy", - dedi Jaqsylyqov Úkimet kýlýarynda.
Onyń aitýynsha, josparly oqý-jattyǵýlardyń orny aldyn ala tańdalady.
"Bul jerde Ýkraina lokatsiiasynyń qatysy qansha? Belarýs – beibit memleket, UQShU múshesi. Ótkizý orny týraly sheshim kúni buryn qabyldanady. Qandai da bir qaýip nemese másele joq", - dedi ministr.
