Prezident qol qoiǵan balalardyń bilimi men qaýipsizdigi týraly zańda litseiler men gimnaziialarǵa birinshi synypqa qabyldaý kezinde emtihan ótkizýge tyiym salatyn ereje engizildi. Onyń mańyzy týraly oqý-aǵartý ministrligi Orta bilim berý komitetiniń tóraǵasy Qanybek Jumashev túsindirdi. Bul týraly "Ult aqparat" Stan.kz aqparat agenttigine silteme jasap habarlaidy.
"Qazaqstan Respýblikasynyń keibir zańnamalyq aktilerine bilim berý, tálimgerlik jáne balalardyń qaýipsizdigi máseleleri boiynsha ózgerister men tolyqtyrýlar engizý týraly" QR zańy qabyldandy. Balalardyń bilimi men qaýipsizdigi týraly zańda litseiler men gimnaziialarǵa birinshi synypqa qabyldaý kezinde emtihan ótkizýge tyiym salatyn ereje engizildi", – dedi komitet tóraǵasy Qanybek Jumashev.
Ol bul sheshim qandai sharttardy negizge alatynyn túsindirdi.
"Birinshiden, bul norma daiyndyq deńgeiine qaramastan, barlyq tiptegi jáne barlyq balaǵa mektepke qabyldaý kezinde shekteýlerdi alyp tastaidy. Bastapqy bilimdi igerýge tanym qabiletteri men áleýmettik qarym-qatynas daǵdylaryn damytýǵa teń múmkindikterge qoljetimdikti qamtamasyz etedi.
Ekinshiden, testileýge, áńgimelesýge qatysýdan psihologiialyq kúizelis, konkýrstyq irikteýdi kútýden jaǵymsyz tájiribe jinalmaidy. Bul jaǵdai balanyń psiho-emotsiialyq jaǵdaiyn nasharlatýy jáne onyń densaýlyǵyna teris áser etýi múmkin.
Úshinshiden, konkýrstyq irikteý nátijelerin kútken ata-ananyń narazylyǵy azaiady. Balalardy mektepke qabyldaý rásiminiń qoǵamdyq rezonansy bolmaidy", – dep túsindirdi vedomstvo ókili.
Ózgerister aldaǵy oqý jylynda birinshi synypqa qabyldaǵan kezde engiziledi.
Eske sala keteiik, Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin Qazaqstanǵa Ilon Masktyń Starlink jabdyǵynyń alǵashqy partiiasy jetkizilgenin aitqan edi.
