Qazaqstan Aziia men Eýropany, Soltústik pen Ońtústikti jalǵaityn mańyzdy tranzittik kópirge ainaldy. Bul týraly QR Tuńǵysh Prezidenti – Elbasy Nursultan Nazarbaev aitty, dep habarlaidy QazAqparat.
«Búginde biz Ortalyq Aziiadaǵy iri ekonomikaǵa ainaldyq. Búkil óńirdegi jalpy ónimniń jartysynan kóbi Qazaqstan úlesine tiesili. Biz elimizge shamamen 250 mlrd dollar tikelei investitsiia tarttyq. Azamattardyń ál-aýqaty eselep artyp, Shyǵys Eýropanyń birqatar eliniń deńgeiine jetti. Reseidi ǵana alǵa jiberip, TMD-da ekinshi orynǵa shyqtyq. Ulttyq qor quryldy. Bul - qazirgi jáne bolashaq urpaq úshin qalqan, baiypty aktiv. Elimizdiń altyn-valiýta qory shamamen 100 mlrd dollardy quraidy. Ekonomikany qarqyndy indýstriialandyrý jáne servistik ónerkásip qurý júrgizilip jatyr. Ol shikizat resýrstaryna táýeldilikten arylýǵa baǵyttalǵan. Teńizge shyǵar joly joq el bolǵandyqtan 15 myń shaqyrymnan astam avtomobil jáne temir jol saldyq», - dedi Elbasy «Astana klýb-2021» otyrysynda.
Nursultan Nazarbaev bul Qazaqstanǵa Tynyq jáne Atlant muhittaryna, sonymen qatar Parsy shyǵanaǵyna shyǵýǵa múmkindik bergenin atap ótti.
«Jáne de 3,6 myń shaqyrym temir jol salyndy. Eger salystyrmaly túrde aitar bolsaq, Keńes biligi 70 jyldyń ishinde uzyndyǵy 1 300 shaqyrym bolatyn bir ǵana Túrkisib temir jolyn saldy. Al bizdiń qysqa ǵana ýaqyttyń ishinde osynshama jol salýymyzdyń ózi talai jaitty ańǵartady. Basqasha aitar bolsaq, Qazaqstan Aziia men Eýropany, Soltústik pen Ońtústikti jalǵaityn mańyzdy tranzittik kópirge ainaldy. Biz uzyndyǵy 15 myń shaqyrymdy quraityn memlekettik shekaramyzda zańdy túrde rásimdedik», - dedi QR Tuńǵysh Prezidenti.
