QR Aýyl sharýashylyǵy ministrligi un eksportyna salynǵan tyiymdy alyp tastap, astyqty shetke shyǵarýǵa shekteý engizedi, dep habarlaidy "Ult aqparat".
Ministrliktiń baspasóz qyzmeti habarlaǵandai, elimizdiń astyqqa degen ishki qajettiligin qamtamasyz etý maqsatynda (onyń ishinde azyq-túlik kólemin saqtaý jáne tamaq ónerkásibin qaita óńdeý úshin) tótenshe jaǵdai kezinde bidai eksportyna shekteý engizilmek. Sondai-aq, QR AShM undy eksporttaý boiynsha tyiymdy alyp tastap, onyń ornyna undy respýblikadan tys jerge shyǵarýǵa shekteý qoiady.
«Osyǵan orai endi bidai men un eksporty QR Aýyl sharýashylyǵy ministrligi ai saiynǵy belgilegen kvota sheńberinde júzege asyrylady. Kvotalardy bólý men olardyń kólemi aldaǵy ýaqytta ministrliktiń resmi internet resýrsynda jariialanady», - dep habarlaidy ministrlikten.
Sondai-aq ministrlik respýblikada qansha astyq kólemi bar ekenin jariialady.
«QR Ulttyq ekonomika ministrligi statistika komitetiniń málimetinshe, 2020 jyldyń 1 naýryzyndaǵy aqparatqa sáikes Qazaqstanda 9,2 mln tonna, onyń ishinde azyq-túlik – 6,4 mln tonna, tuqymdyq – 1,5 mln tonna, jemdik – 1,3 mln tonna astyq bar», - dep habarlaidy ministrliktiń baspasóz qyzmetinen.
