21 jyl buryn 1997 jyldyń 10 jeltoqsany kúni sol kezdegi Aqmola qalasy resmi túrde elimizdiń elordasy atandy.
1997 jyldyń 10 jeltoqsanynda QR Prezidenti, Úkimet pen Parlamenttiń basshylary Qazaqstan astanasy týraly el halqyna joldanǵan úndeýge qol qoiyp, ol baspasózde jariialandy. Onda baitaq eldiń ortalyǵynda osy kúnnen bastap jáne ǵasyrlar boiy halyq taǵdyry úshin túbegeili mańyzdy sheshimder qabyldanatyny aityldy. Sondai-aq dál osy kúni Memleket basshysy Nursultan Nazarbaev qala ákimi qyzmetine Ádilbek Jaqsybekovti taǵaiyndady.
Tarihqa sál sheginis jasasaq, astanamyzdy Almatydan Saryarqa tórine kóshirý týraly syndarly sheshimdi 1994 jyldyń 6 shildesinde Qazaqstan Respýblikasynyń Joǵarǵy Keńesi qabyldaǵan bolatyn.
Sol bir kúni Parlamenttiń sessiiasynda depýtattar aldynda sóz sóilegen Elbasy Nursultan Nazarbaev astanamyzdy Almatydan respýblikanyń ortalyq óńiri Aqmolaǵa kóshirýdiń qisyndylyǵyn atap ótip, elordany tańdaý 32 ólshem boiynsha júrgizilgenin táptishtep dáleldep bergen edi. Osydan keiin depýtattar arasynda ótken tartysty pikirtalastan keiin halyq qalaýlylary memlekettik iste jáne shetkeri qalaǵa kóshý máselesinde jeke bastyń múddesine oryn joq ekendigin jete túsinip, qairatkerlik tanyta bildi. Nátijesinde Joǵarǵy Keńestiń «Qazaqstan Respýblikasynyń Prezidenti N.Á.Nazarbaevtyń memleket astanasyn Aqmola qalasyna aýystyrý týraly usynysyna kelisim berilsin» degen sheshimi qabyldandy. Osylaisha elimizdiń egemen tarihyndaǵy aitýly oqiǵa júzege asyryldy.
Al araǵa eki jyl salyp 1996 jyldyń 6 shildesinde Qazaqstan Úkimeti «Qazaqstan Respýblikasynyń astanasyn kóshirý týraly» tarihi qaýly qabyldady. Bir jyldan keiin 1997 jyldyń 20 qazanynda QR Prezidentiniń «Aqmola qalasyn Qazaqstan Respýblikasynyń astanasy dep jariialaý týraly» asa mańyzdy Jarlyǵy jaryq kórdi. Osy qujatqa sáikes Aqmola Qazaqstannyń astanasy quqyǵyn 1997 jyldyń 10 jeltoqsanynan bastap ielendi jáne jańa astananyń resmi tusaýkeser toiy 1998 jyldyń 10 maýsymyna belgilendi.
1997 jylǵy 8 qarashada Aqmolanyń ortalyǵynda jańa astanaǵa basty memlekettik simvoldardyń jetkizilýi saltanatty jaǵdaida ótti. Osy kúnderi jańa astanaǵa Prezident Ákimshiligi, Úkimet, jetekshi ministrlikter men vedomstvolar qyzmetkerleriniń alǵashqy toby da keldi. Bul jaiynda Elbasy Nursultan Nazarbaev óziniń «Eýraziia júregindegi» degen kitabynda: «Men Aqmolaǵa ketip bara jatqan Prezident Ákimshiliginiń qyzmetkerlerine aq jol tiledim. Óz sózimde astanany kóshirýdiń bir mańyzdy qyryna toqtaldym. Astananyń qonys aýdarýyna bailanysty is júzinde biliktiń ózin reformalaýdyń jańa kezeńi bastaldy. Jańa elordada memlekettik qyzmetshilerdiń tyń tolqynyn qalyptastyratyn bolamyz. Bul jumysty ortalyq memlekettik organdar qyzmetkerlerinen bastaimyz. Bastapqy kezde qiynshylyq bolmaitynyna kepildik bere almaitynymdy aittym», - dep jazǵan edi.
Búginde Astana halyqaralyq mańyzy bar túrli forýmdar, kongrester men ózge de is-sharalar ótetin Eýraziia keńistiginiń ortalyǵyna ainaldy. Elordada Álemdik jáne dástúrli dinder liderleriniń sezderi, Astana ekonomikalyq forýmy jáne ózge de mańyzdy halyqaralyq oqiǵalar turaqty túrde ótip keledi. Astanada EQYU-nyń tarihi sammiti, ShYU men IYU-nyń mereitoilyq sammitteri boldy. 2011 jyldyń basynda respýblikanyń elordasy VII Qysqy Aziia oiyndarynyń qatysýshylary men qonaqtaryn qabyldady. 2017 jyly «EHRO-2017» halyqaralyq kórmesin joǵary deńgeide uiymdastyrdy.
Qazirgi ýaqytta 1 millionnan astam turǵyny bar elorda «Almaty», «Saryarqa», «Esil» jáne «Baiqońyr» aýdandarynan turady. 1999 jyly IýNESKO sheshimimen «álem qalasy» ataǵyn alsa, 2000 jyldan bastap Astanalar men iri qalalardyń halyqaralyq assambleiasynyń múshesi sanalady.
Ótken 21 jyl ishinde Astananyń arhitektýralyq kelbeti ǵana emes, bas qalanyń áleýmettik-ekonomikalyq damý kórsetkishteri de adam tanymastai ózgerdi. Elordada biznes qanat jaiyp, qurylys salasy, qyzmet kórsetý, taýar ainalymy men kólik salasy qarqyndy túrde damydy. Máselen, Astana qalalyq Statistika departamentiniń málimetterine qaraǵanda, osy jyldar aralyǵynda elorda biýdjeti 77,5 esege, 1997 jylǵy 6,4 mlrd teńgeden 2017 jyly 496,1 mlrd teńgege ósken. Jalpy ishki óńirlik ónim 224 esege ósip, 1997 jyly 25,7 mlrd teńge bolsa, qazirgi tańda 5 trln teńgege jetti, bul kórsetkishtiń ózi jan basyna shaqqandaǵy jalpy respýblikalyq kórsetkishten 2 esege artyq. Al investitsiianyń jyldyq kólemi 1997 jyldan beri 50 esege ósip, 19,3 mlrd teńgeden 956,9 mlrd teńgege jetip otyr.
Jalpy aitqanda, dál osy 10 jeltoqsan kúni egemen elimizdiń tarihynda, Elbasynyń taǵy bir strategiialyq mańyzy zor ideiasy júzege asty. Qazaq halqy Táýelsizdiktiń arqasynda óz astanasyn ózi tańdap, saiasi-ákimshilik, mádeni-rýhani ortalyǵyn belgiledi. Al búgingi Astana ózge óńirler boi túzeitin qala ǵana emes, el damýynyń tiregine ainaldy.
